काठमाडौं -मोरङ धनपालथान गाउँपालिका-२ बरियाती टोलबाट करिब ३ किलो १ सय ५ ग्राम अवैध लागूऔषध गाँजा सहित सोही ठाउँ बस्ने ४० वर्षीय वसन्त पासवानलाई आइतबार दिउँसो प्रहरीले पक्राउ गरेको छ । विशेष सूचनाको आधारमा प्रहरी चौकी अमाहिवरियातीबाट खटिएको प्रहरीले उनको घर तलासी गर्दा उक्त गाँजा सहित फेला पारी उनलाई पक्राउ गरेको हो । साथै उक्त गाँजा ओसारपसारमा संलग्न रहेको अभियोगमा सुनसरी धरान उपमहानगरपालिका-१६ बस्ने ३६ वर्षीय रबिन राईलाई नगद २० हजार ५ सय रुपैयाँ र सोही ठाउँ बस्ने २९ वर्षीय वचन राईलाई प्रदेश नम्बर १-०२०-०४५ प २६९९ नम्बरको मोटरसाइकल सहित प्रहरीले नियन्त्रणमा लिएको छ ।
झापा मेचीनगर नगरपालिका-१० खनाल बस्ती बस्ने ३२ वर्षीय विक्रम प्रसाई र सोही नगरपालिका-९ बस्ने ४४ वर्षीय संजय खड्कालाई ५ ग्राम अवैध लागूऔषध ब्राउनसुगर जस्तो देखिने पदार्थ, १ थान डिजिटल तराजु र नगद १९ हजार ५ सय रुपैयाँ सहित आइतबार दिउँसो प्रहरीले पक्राउ गरेको छ । बिशेष सूचनाको आधारमा ईलाका प्रहरी कार्यालय धुलाबारीबाट खटिएको प्रहरीले खड्काको भान्सा कोठा तलासी गर्दा उक्त पदार्थ सहित फेला पारी दुवै जनालाई पक्राउ गरेको हो ।
पर्सा वीरगंज महानगरपालिका-१५ स्थित सडकबाट नियन्त्रित लागूऔषध २ सय ५० एम्पुल नूफिन, २ सय ५० एम्पुल डाइजेपाम र २ सय ५० एम्पुल फेनारगन सहित धोबिनी गाउँपालिका-२ आशवारी बस्ने १९ वर्षीय पृथ्वी सिंह कुर्मीलाई आइतबार बिहान प्रहरीले पक्राउ गरेको छ । विशेष सूचनाका आधारमा जिल्ला प्रहरी कार्यालय पर्साबाट खटिएको प्रहरीले जाँच गर्ने क्रममा चामलको बोराभित्र लुकाइ छिपाई ल्याएको उक्त लागूऔषध सहित फेला पारी उनलाई पक्राउ गरेको हो ।