काठमाडाैं– प्रधानमन्त्री पुष्पकमल दाहाल ‘प्रचण्ड’ ले विद्युतीय चुरोटमा लुकाएकाे ९ किलो सुन प्रकरणमा मुछिएका नेकपा माओवादी (केन्द्र)का उपाध्यक्ष कृष्णबहादुर महराबारे आज-भोलिमा प्रहरीले निर्णय गर्ने बताएका छन्।
मंगलबार बालुवाटारमा सम्पादकहरूसँग कुराकानी गर्दै प्रधानमन्त्री प्रचण्डले यस्ताे बताएका हुन्। सम्पादकहरूसँग उनले आफू सुन तस्करीमा संलग्न जोसुकैलाई पनि कारबाही गर्ने कुरामा स्पष्ट रहेको बताएका छन्।
साे प्रकरणमा प्रहरीकाे अनुसन्धानबाट सुन तस्करी गर्ने चिनियाँ नागरिकसँग महराका बाबु-छोराले सयाैँपटक फाेन सम्पर्क कल डिटेल फेला पारेकाे थियाे।
‘मैले महराजीलाई पनि बोलाएर यो प्रकरणमा तपाईंको कुरा के हो क्लियर गर्नुस् भनेको छु, प्रहरीको नेतृत्वलाई निष्पक्ष छानबिन गर्नुस्। दोषी कोही नउम्किऊन्, निर्दोष नपरून् भनेको छु’ उनले भने ‘मैले प्रहरीलाई महराजीहरूको संलग्नता भए अनुसन्धान गर्नुपर्थ्यो, मुद्दा चलाउनुपर्थ्यो भनें। दोषी छैनन् भने पनि आमनागरिकलाई उनीहरूको संलग्नता छैन भन्नुपर्थ्यो।’
उनले महराका बाबु-छोराको सुन तस्करीमा संलग्नता देखिए बोलाएर बयान लिन र अनुसन्धान गर्न प्रहरीलाई निर्देशन दिएको पनि बताए।
‘यो विषयमा मैले पार्टीभित्र पनि कुरा गरेको छु। प्रहरीलाई पनि भनेको छु, महराजीबारे प्रहरीले आज-भोलिमा के गर्ने भन्ने निर्णय गर्छ’ उनले भने।