काठमाडौं -काठमाडौं महानगरपालिका-३२ जडिबुटी डेरा गरी बस्ने काभ्रे धुलिखेल नगरपालिका-१२ घर भएका विमल राज गौतमको कोठामा बुधबार साँझ आगलागी हुँदा उनका छोरा ४ वर्षीय प्रनिश गौतमको जलेर मृत्यु भएको छ । जलेर गम्भीर घाइते  भएका उनको किष्ट अस्पताल ग्वार्कोमा उपचारको क्रममा मृत्यु भएको हो । साथै आगलागीबाट कोठामा रहेका विभिन्न सामान जलेर नष्ट भएका छन् ।

सप्तरी तिरहुत गाउँपालिका-३ धाता टोल बस्ने हेम नारायण साफीको घरमा बिजुलीको तार सर्ट भई बुधबार राति  आगलागी हुँदा ७ चौपायाको साथै आरके ल्याब डाईग्नोस्टि सेन्टरको बल्ड टेस्ट गर्ने १ थान मेसिन, १ थान फ्रिज, औषधीहरु, ल्यापटप कम्प्युटर लगायत सामान जली करिब ७ लाख ३४ हजार रुपैयाँ बराबरको धनमाल नष्ट भएको छ ।