काठमाडौं- धादिङ थाक्रे गाउँपालिका-१ खयरघारीस्थित सडकमा प्रदेश नम्बर ३-०२-००७ प ९८९१ नम्बरको मोटरसाइकल आफैँ अनियन्त्रित भई सडकबाट करिब ३० मिटर तल खसेर आइतबार दिउँसो दुर्घटना हुँदा मोटरसाइकलमा सवार धुनबेसी नगरपालिका-७ बस्ने २२ वर्षीय श्रीजन पाठकको घटनास्थलमै मृत्यु भएको छ । साथै दुर्घटनामा घाइते भएका मोटरसाइकल चालक धुनिबेशी नगरपालिका-७ बस्ने २२ वर्षीय किशोर गिरिलाई स्थानीय मेडिकल हुँदै थप उपचारको लागि ट्रमा सेन्टर काठमाडौंतर्फ पठाइएको छ ।

उदयपुर चौदण्डीगढी नगरपालिका-५ सुन्दपुरस्थित सडकमा स.१० प ८७९८ नम्बरको मोटरसाइकलले प्र १-०२-००१ क ३८९६ नम्बरको टिपरलाई ओभरटेक गर्नेक्रममा टिपरसँग ठक्कर खाई आइतबार बिहान दुर्घटना हुँदा मोटरसाइकल चालक त्रियुगा नगरपालिका-१ जोगिदह मैना बस्ने २६ वर्षीय गंगाराम चौधरीको घटनास्थलमै मृत्यु भएको छ । साथै दुर्घटनामा घाइते भएकी मोटरसाइकलमा सवार गंगारामकी श्रीमती २५ वर्षीया संगिता चौधरीको विराटनगर न्यूरो अस्पतालमा उपचार भइरहेको छ । टिपर चालकलाई प्रहरीले नियन्त्रणमा लिएको छ ।