सुनसरी- श्री पिण्डेश्वर महादेव अर्धनारिश्वरी सदगुरुदेव अर्चना बाबा १०८ शिव साधनामध्ये बोलबम विशेष १०२ औं शिव साधना बराहक्षेत्र चतराधामस्थित औलिया मठमा शुरु भएको छ।
हिजो शुक्रबारदेखि शिव साधनामा आदि जगदगुरु श्री ॐ बाबाको सतसंकल्प र सदगुरुदेव अर्चना बाबाको सानिध्यतामा शुरु भएको हो।
पिण्डेश्वर नगरी प्राचीन हरिद्वार सिद्धभूमि चतरागद्दीस्थित महामुनि औलिया बाबा मठ तथा सप्तकोशी आश्रम परिसरमा हजारौं भक्तजनको उपस्थितिमा आइतबारसम्म शिव साधना जारी रहने राजकुमार शम्भोले जानकारी दिए।
ॐ श्री सम्प्रदायमा आस्थावान सदगुरुदेव अर्चना बाबाका देशविदेशका भक्तहरूको उपस्थितिमा भजनकीर्तन, शिव साधना र बोलबम सकीर्तन भइरहेको श्री अर्चना बाबाधाम बराहक्षेत्रका सल्लाहकार महेश बज्राचार्यले जानकारी दिए।
उनका अनुसार भारतका सिक्किम, दार्जिलिङसहित पश्चिम नेपालका कैलाली, कञ्चनपुर,बाके, बर्दिया, रोल्पा, रुकुम, जाजरकोटसहित १८ जिल्ला र पूर्वी नेपालका सुनसरी, मोरङ, उदयपुर र झापालगायत जिल्लाबाट भक्तजनहरूको शिव साधनामा उपस्थिति छ।
शिव साधनाअन्तर्गत भक्तजनहरूको बराह भगवानको परिक्रमा र बराहक्षेत्र नगर परिक्रमासमेत गर्ने श्री अर्चना बाबाधामका सयोजक विजय राईले जानकारी दिए।
अर्चना बाबाधामको आयोजनामा हरेक वर्ष साउनको पहिलो सोमबार हजारौं भक्तजनले पीण्डेश्वर महादेवमा सप्तकोशीको जल अर्पण गर्दै आएका छन्। शुक्रबारदेखि आइतबारसम्म त्रिदिवसीय शिवसाधनाको आयोजना गर्ने र सोमबार रुद्राक्षारण्य महादेवमा जल अर्पण गर्ने नियमित कार्य भएको बाबाधामका सयोजक राईले जानकारी दिए।