काठमाडौं- आज पहाडी भूभागका केही स्थानमा क्षणिक र हल्का वर्षाको सम्भावना रहेको जल तथा मौसम विज्ञान विभागको पूर्वानुमान छ।
तथापि, त्यस्तो वर्षा कोशी, कर्णाली, वागमती र गण्डकीका थोरै स्थानमा मात्र हुने विभागको पूर्वानुमान छ।
विभागका अनुसार तराईमा अधिकतम र न्यूनतम तापक्रम केही दिन नघट्ने देखिएको छ। त्यसका कारण तराईमा तातो हावा (लू)को लहर चलिरहने भएको छ।
पहाडका थोरै स्थानमा भने क्षणिक वा हल्का वर्षाको सम्भावना छ। त्यस्तो वर्षाले क्षणिक रूपमा ती क्षेत्रका बासिन्दालाई गर्मीबाट राहत दिने छ। वर्षाका क्रममा चट्याङ पर्ने सम्भावना रहेकाले त्यसबाट बच्न विभागले आग्रह गरेको छ।
पश्चिमी र स्थानीय वायुको आंशिक प्रभावका कारण आज दिउँसो कोशी, कर्णाली र सुदूरपश्चिमलगायत देशका पहाडी भेगमा आंशिकदेखि सामान्य बदली रही बाँकी क्षेत्रमा मौसम सफा रहने अनुमान छ। कोशी र कर्णाली प्रदेशका थोरै र बाँकी प्रदेशका पहाडी भेगका १-२ स्थानमा मेघ गर्जन र चट्याङसहित क्षणिक वा हल्का वर्षाको सम्भावना छ।
आज राति कोशी प्रदेशलगायत पहाडी भेगमा आंशिक बदली रही बाँकी क्षेत्रमा मौसम सफा रहने पूर्वानुमान छ। कोशी प्रदेशका थोरै तथा वागमती र गण्डकीका पहाडी भेगका १-२ स्थानमा मेघ गर्जन र चट्याङसहित क्षणिक वा हल्का वर्षाको सम्भावना छ।