पाल्पा- जिल्लामा आइतबार भएको जिप दुर्घटनामा तीनजनाको मृत्यु भएको छ।

रुपन्देहीको सालझण्डीबाट अर्घाखाँचीको पणेना जाँदै गरेको लु१च ९०२४ नम्बरको जिप रैनादेवीछहरा गाउँपालिका-८ सत्यवतीमा आज साँझ ५ बजे दुर्घटना भएको हो।

घटनामा अन्य १२ जना घाइते भएको वडाध्यक्ष रेमबहादुर रानाले बताए। घाइतेलाई स्थानीयवासी तथा प्रहरीको सहयोगमा उद्धार गरी उपचारका लागि बुटवलतर्फ पठाइएको वडाध्यक्ष रानाले जानकारी दिए।

घटनास्थलमा इलाका प्रहरी मुझुङ, प्रहरी चौकी बल्ढेङगढी र इलाका सालझण्डीका टोली उद्धारमा खटिएका छन्। यो समाचार तयार पार्दासम्म मृतकको पहिचान हुन सकेको छैन। दुर्घटनासम्बन्धी अहिले अनुसन्धान भइरहेको जिल्ला प्रहरी कार्यालय पाल्पाले जनाएको छ।