काठमाडौं- जल तथा मौसम विज्ञान विभागले आगामी केही दिन अत्यधिक गर्मी बढ्ने देखिएकाले त्यसबाट बच्न उच्च सावधानीका लागि आग्रह गरेको छ।
विभागका अनुसार आगामी २४ घण्टामा देशका अधिकांश भूभागको अधिकतम र न्युनतम तापक्रम बढ्ने सम्भावना छ। कोशी, कर्णाली र सुदूरपश्चिम प्रदेशका पहाडी भूभागका थोरै तथा बाँकी पहाडी भेगका १-२ स्थानमा मेघ गर्जन र चट्याङसहित हल्का वर्षाको सम्भावना छ।
देशभर अहिले पश्चिमी र स्थानीय वायुको आंशिक प्रभाव छ। आज दिउँसो देशका पहाडी भूभागमा आंशिकदेखि सामान्य बदली रही बाँकी भूभागमा मौसम सफा रहनेछ। अर्थात्, चर्को गर्मीको सामना गर्नुपर्ने सम्भावना छ।
कोशी, कर्णाली र सुदूरपश्चिम प्रदेशका पहाडी भूभागका थोरै तथा बाँकी पहाडी भेगका १-२ स्थानमा मेघ गर्जन र चट्याङसहित हल्का वर्षाको सम्भावना छ।
आज राति पहाडी भूभागमा आंशिक बदली रही बाँकी भेगमा मौसम सफा रहने छ। कोशी प्रदेशका पहाडी भेगका १-२स्थानमा मेघ गर्जन र चट्याङसहित हल्का वर्षाको सम्भावना छ।
विभागका अनुसार आगामी पाँच दिन तराई क्षेत्रमा तातो हावा ‘लु’ बहने सम्भावना देखिएको छ। केही दिनयता देशका अधिकांश भूभागको अधिकतम र न्यूनतम तापक्रम वृद्धि भइरहेको देखिन्छ। काठमाडौं उपत्यकालगायत देशका अन्य उपत्यकाहरूमा समेत तापक्रममा क्रमिक वृद्धि भइरहेको र मुख्यतया मध्य तराई र आसपासमा अधिकतम तापक्रम ४० डिग्री सेल्सियस वा त्यसभन्दा बढी मापन भएको विभागले जनाएको छ।
तराईका अधिकांश भूभागमा अधिकतम र न्यूनतम तापक्रम क्रमिक रूपमा बढ्दै जाने देखिएको विभागको भनाइ छ। तसर्थ, तराई भूभागमा आगामी पाँच दिनसम्म तातो हावा तथा ‘लु’ लाग्न सक्ने सम्भावना रहेकोले त्यसबाट बच्न आवश्यक सतर्कता अपनाउन विभागले आग्रह गरेको छ। साथै, पहाडी भेगका उपत्यका तथा खोंचहरूमा समेत तापक्रम क्रमिक रूपमा बढ्न सक्ने सम्भावना रहेको विभागले जनाएको छ।
तातो हावा तथा ‘लु’बाट हुने सम्भावित असरहरू थकाइ लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशीहरू दुख्ने, बान्ता आदि हुनसक्ने देखिएकाले त्यसबाट बच्न केही उपाय विभागले सुझाएको छ।
विभागका अनुसार बढी गर्मीको समयमा घरभित्र अर्थात् चिसो स्थानमा रहने, बाहिरी वातावरणमा बढी नजाने, घाममा बढी हिँडडुल नगर्ने, हल्का लुगा लगाउने, सुती कपडा लगाउने, बाहिर निस्कँदा टाउको छोप्ने, टोपी लगाउने, पटक-पटक पानी तथा झोल पदार्थ (जुस, सर्वत आदि) प्रशस्त मात्रामा पिउने र स्वास्थ्यमा समस्या भएमा स्वास्थ्यकर्मीसँग नियमित सम्पर्कमा रही थप सल्लाह सुझाव लिन पनि विभागले आग्रह गरेको छ।