सिडनी- अस्ट्रेलियामा १० करोड ७० लाख वर्ष पुरानो जीवाश्म हड्डी भेटिएको छ।
सन् १९८० को दशकमा भिक्टोरिया राज्यमा भेटिएका दुईवटा जीवाश्म हड्डीको परीक्षण गरेका वैज्ञानिकहरूले आफ्नो अनुसन्धानको निष्कर्ष सुनाउँदै उक्त जानकारी दिएका हुन्।
ती जीवाश्म आकाशमा उड्ने विशाल सरीसृपको भएको र तिनको उत्पत्ति १० करोड ७० लाख वर्षअघि भएको उनीहरूको निष्कर्ष छ।
हिस्टोरिकल बायोलोजी जर्नलमा मंगलबार प्रकाशित रिपोर्टअनुसार कर्टिन युनिभर्सिटी अस्ट्रेलियन एज अफ डाइनोसर म्युजियम अफ नेचुरल हिस्ट्री, मोनास युनिभर्सिटी र म्युजियम्स भिक्टोरिया रिसर्च इन्स्टिच्युटका अन्वेषकहरूले भिक्टोरियामा भेटिएका जीवाश्म टेरोसरको भएको पुष्टि गरेका छन्।
‘यी हड्डीहरूको विश्लेषण गरेर, हामी लगभग १० करोड ७० लाख वर्षअघि भिक्टोरियाको जंगलमा बसोबास गर्ने टेरोसरको अस्तित्वको पुष्टि गर्न सक्षम भएका छौं,’ पेन्टल्यान्डले जर्नलमा उल्लेख गरेका छन्।