नयाँदिल्ली- आईपीएलको अन्तिम म्याचमा गुजरात टाइटन्सले रोयल च्यालेन्जर्स बैंगलोरलाई ६ विकेटमा हराउँदै टुर्नामेन्टबाट बाहिर पठाएको छ भने मुम्बई इन्डियन्स प्लेअफमा पुगेको छ।
वर्षाका कारण ढिलो शुरु भएको म्याचमा हार्दिक पाण्ड्याले टस जितेर रोयल च्यालेन्जर्स बैंगलोरलाई पहिले ब्याटिङका लागि बोलाएका थिए। विराट कोहलीको शतक योगदानका साथ बैंगलोरले २० ओभरमा ५ विकेटको क्षतिमा १९७ रन जोड्यो। लक्ष्य पछ्याउँदै उत्रिएको गुजरात टाइटन्सका टिम ओपनर शभमन गिलले आफ्नो दोस्रो शतक जोडे अनि टिमलाई जित दिलाए।
शुभमन गिलले आफ्नो शतक केवल ५० बलमा पूरा गरे। र, ५२ बलमा १०४ रन बनाउँदै अविजित रहे। आफ्नो पारीमा शुभमनले ८ छक्का र ५ चौका प्रहार गरे।
गुजरातको पारीको शुरुवातमा रिद्धिमान साह र शुभमनले पहिलो विकेटका लागि केवल २५ रन जोडेका थिए। त्यसलगत्तै विजय शंकरका साथ शुभमनले शतकीय साझेदारी वहन गरे। त्यससँगै बैंगलोरको यस सिजनको आईपीएल यात्रा समाप्त भयो। र, गुजरात टाइटन्सले म्याच जित्यो। अनि मुम्बई इन्डियन्सलाई प्लेअफमा पुग्ने बाटो खुला भयो।
यसअघि आइतबार क्यामरुन ग्रिनको शतकीय पारीका साथ मुम्बई इन्डियन्सले सनराइजर्स हैदराबादलाई ८ विकेटले पराजित गरेको थियो। यो मुम्बई इन्डियन्सको अन्तिम लिग म्याच थियो।
त्यसका बावजुद मुम्बई इन्डियन्सलाई प्लेअफमा पुग्न बैंगलोर र गुजरातको म्याचको परिणामको प्रतीक्षा थियो। जब गुजरातले त्यो म्याच जित्यो, मुम्बईका लागि प्लेअफमा पुग्ने बाटो खुल्यो।