उदयपुर- सामुदायिक वन उपभोक्ता महासंघ उदयपुरले बेलका नगरस्तरीय समितिमा अवैधानिक नेतृत्व चयन गरेको आरोप लागेको छ।
बेलका नगरस्तरीय भन्दै घोषणा गरिएको समितिप्रति बेलका नगरपालिकाअन्तगर्तका अधिकांश वन समूहले असन्तुष्टी जनाएका छन्।
नगरपालिकाभित्र रहेका ५२ वटा सामुदायिक वन उपभोक्ता समितिमध्ये ३२ भन्दा बढी समूहका पदाधिकारीहरूले विज्ञप्तीमार्फत असन्तुष्टी जनाएका हुन्। नगरस्तरीय सामुदायिक उपभोक्ता महासंघका तर्फबाट अवैध रूपमा प्रतिनिधि छनोट भएकामा गम्भीर ध्यानाकर्षण भएको र त्यसप्रति आपत्ति रहेको विज्ञप्तीमा उल्लेख छ।
बेलका नगर स्तरीय वन उपभोक्ता महासंघको ३० चैतमा सम्पन्न अधिवेशनमा नेतृत्व चयनका विषयमा समझदारी बन्न नसकेको तथा लोकतान्त्रिक विधि र प्रक्रियामार्फत नेतृत्व चयनका सन्दर्भमा समेत बेवास्ता गरी सबैको सहमतिमा नेतृत्व चयनको विषयलाई पछि टुंग्याउने गरी अधिवेशन स्थगित भएको विज्ञप्तीमा उल्लेख छ।
अधिवेशन स्थगित भएकोमा एकाएक जिल्ला महासंघको अधिवेशनका लागि केही व्यक्तिले मनोमानी ढंगबाट एकलौटी प्रतिनिधि छनोट गरी अवैध तरिकाले प्रतिनिधि बनाएको विज्ञप्तिमा उल्लेख छ। ती अवैधानिक प्रतिनिधिलाई मान्यता नदिन विज्ञप्तिमा आग्रह गरिएको छ।
२४ वैशाखमा बेलका नगरस्तरीय महासंघको अध्यक्षमा मनोज तामाङ दोस्रो कार्यकालका लागि निर्वाचित भएको घोषणा गरिएको थियो। उक्त कार्य अवैध रहेको विज्ञप्तिमा उल्लेख छ।
अध्यक्षमा जाल्पादेवी सामुदायिक वन उपभोक्ता समितिका अध्यक्ष हीराजंग राई र सप्तकोशी बेलका सामुदायिक वन उपभोक्ता समितिका अध्यक्ष महाप्रसाद ढकाल पनि प्रत्यासी थिए। तर, वैधानिक प्रतिस्पर्धा नगराई एकलौटी ढंगले तामाङलाई अध्यक्ष घोषणा गरिएको छ।
निर्वाचन समितिका पदाधिकारी कुशल बाबु बस्नेतले भने आरोपको खण्डन गर्दै अध्यक्षमा मनोज तामाङ र उपाध्यक्षमा हीराजंग राईलाई चयन गरिएको बताए।