काठमाडौं– क्यानाडा र चेक रिपब्लिक पठाइदिन्छु भनी लाखौं रुपैयाँ ठगी गर्ने व्यक्तिलाई प्रहरीले पक्राउ गरेको छ।
सिन्धुलीको कमलामाई नगरपालिका–४ घर भई हाल काठमाडौं नयाँ बजार बस्ने ३४ वर्षका उद्धव नेपाल भन्ने सुवर्ण मंग्रातीलाई प्रहरीले पक्राउ गरेको हो। उनले बाबुराम सापकोटासमेत चार जनालाई वैदेशिक रोजगारीका लागि क्यानाडा र चेक रिपब्लिकलगायत देशमा पठाउने भन्दै ठगी गरेका छन्।
ती मुलुक जान जनही १० लाख रुपैयाँ लाग्ने भन्दै रकम असुलेको पाइएको काठमाडौं उपत्यका अपराध अनुसन्धान कार्यालयका एसपी रवीन्द्र रेग्मीले जानकारी दिए।
त्यहाँ पुगेपछि प्रतिष्ठित अटोमोबाइल कम्पनीमा जनरल वर्करको काम लगाइदिने र मासिक दुई लाख रुपैयाँसम्म तलब पाइने भन्दै उनले पीडितबाट पाँच लाख रुपैयाँ लिइसकेको अनुसन्धानमा खुलेको छ।
रकम लिएपछि फरार भएका उनलाई वैदेशिक रोजगार विभागबाट पक्राउ गरी उपस्थित गराइदिन गरेको अनुरोधको आधारमा पक्राउ गरिएको प्रहरीले जनाएको छ।
नक्कली विज्ञापन गरी ठगी
यस्तै, काठमाडौं उपत्यका अपराध अनुसन्धान कार्यालयले मोबाइल बिक्रीको नक्कली विज्ञापन राखी ठगी गर्नेलाई पनि पक्राउ गरेको छ। पक्राउ परेका धनुषाका आदित्य कर्णले विभिन्न मोडलका मोबाइल सेट किन्नका लागि सम्पर्कमा आएमा आएका व्यक्तिलाई पोखरा, चितवनलगायत स्थानमा मोबाइल पसल छ भनी कुरियर, कार्गोलगायत माध्यमबाट डेलिभरी गर्ने भन्दै रकम ठगी गरेका थिए।
उनले यसरी झुक्याएर अर्डरबमोजिमको मोबाइल उपलब्ध नगराई १५ जनाबाट चार लाख ८५ हजार रुपैयाँ ठगी गरेको उजुरी परेको थियो। उनलाई ठगीसम्बन्धी कसुरमा आवश्यक अनुसन्धान एवं कारवाहीका लागि काठमाडौं जिल्ला प्रहरी परिसर, टेकु पठाइएको एसपी रेग्मीले जानकारी दिए।