सुनसरी- छिमेकी नगरसँगको सीमा विवादले धरानमा खानेपानीका लागि जारी श्रमदान अभियानमा असर परेपछि धरानका मेयर हर्क साम्पाङले छिमेकी नगर बराहक्षेत्रका सबै माग पूरा गर्ने प्रतिबद्धता व्यक्त गरेका छन्।
शनिबार बराहक्षेत्र नगरपालिकाको कार्यालयमा बसेको सर्वपक्षीय बैठकमा नगर प्रमुख रमेश कार्कीले आफ्नो असहमति प्रकट गरेका थिए। बैठकमा उपस्थित जिल्ला समन्वय समिति महासंघका केन्द्रीय अध्यक्ष तथा सुनसरी सभापति राजन मेहेताको रोहबरमा छलफलपछि लिखित सहमति गर्ने टुंगो लागेको छ।
छलफलमा बराहक्षेत्रका मेयरसहित, धरानका मेयर हर्क साम्पाङ, उपमेयर अइन्द्रविक्रम बेघा, बराहक्षेत्रका वडाअध्यक्षहरू, सहायक प्रमुख जिल्ला अधिकारीलगायत सचेत धराने समूहका अभियन्ताहरूको उपस्थिति थियो।
बराहक्षेत्रका नगरप्रमुख कार्कीले धरान उपमहानगरको खानेपानी व्यवस्थापनका लागि गरिएको संस्थागत निर्णय, धरान खानेपानी बोर्डको संस्थागत निर्णय, वातावरणीय प्रभाव मूल्यांकन प्रतिवेदन र धरानलाई सशुल्क पानी वितरण गर्न लागिएको हो भने निश्चित कर दिनुपर्ने माग राखेका थिए।
नगर कार्यपालिकाले खानेपानीसम्बन्धी सम्पूर्ण निर्णय गर्ने अधिकार नगरप्रमुखलाई प्रत्यायोजन गरेकाले आफूले पठाएको पत्रलाई आधिकारिक मान्न धरान प्रमुख साम्पाङले अनुरोध गरेका थिए। मेयर साम्पाङले बराहक्षेत्रका सम्पूर्ण माग पूरा गर्ने मौखिक प्रतिबद्धता जनाएका थिए।
जिल्ला समन्वय समितिका सभापति राजन मेहेताले २ दिनभित्रमा लिखित सहमति गर्न दुवै नगरप्रमुखलाई प्रतिबद्धता गराएअनुसार धरानका नगरप्रमुखले उपप्रमुख अइन्द्रविक्रम बेघालाई अधिकार प्रत्यायोजन गरेका छन् भने बराहक्षेत्रले आइतबार कार्यपालिकाको बैठक बिहान ८ बजे डाकेको छ। बैठकले कार्यदल निर्माण गर्नेछ।
धरानलाई पर्याप्त खानेपानी सुविधाका लागि श्रमदान अभियानमा लागिपरेका हर्क साम्पाङले बराहक्षेत्र नगरपालिकाको सहमतिबिना पाइप बिछ्याउने काम गरेका थिए। बराहक्षेत्रको कार्यपालिका बैठकले धरानलाई खानेपानी वितरणमा सहयोग गर्ने निर्णय गरेको थियो। तर, धरानमा सीमा विवादबारे आयोजित पत्रकार सम्मेलनमा बराहक्षेत्रको भूगोलमा पर्ने अमाह सीमसार धरानमा पर्ने अभिव्यक्ति दिएपछि बराहक्षेत्र नगरपालिका भड्किएको थियो। नगरप्रमुख कार्कीले खानेपानीका लागि जारी श्रमदानस्थलमै पुगेर काम रोक्न आग्रह गरेका थिए।
शनिबार छलफलपछि धरानका उपमेयर बेघाले बराहक्षेत्रको भूमि आफूले दाबी नगरेको बताए। उनले अमाह सीमसार बराहक्षेत्रले भोगचलन गर्दै आएको र बराहक्षेत्रकै सम्पदा भएको प्रतिक्रिया दिए।