सुनसरी- हिमालयन टेलिभिजनबाट प्रसारण भइरहेको गायन रियालिटी सो ‘भ्वाइस किड्स नेपाल’मा उत्कृष्ट बराहक्षेत्रका राजेश परियारलाई भोट गर्न विद्यालयले आर्थिक संकलन गरेको छ।
राजेश अध्ययनरत हिमालयन इंग्लिस स्कुल चतराले उत्कृष्ट २४ मा पर्न सफल आफ्ना विद्यार्थीका लागि शिक्षक, विद्यार्थीबाट रकम संकलन गरी परिवारलाई हस्तान्तरण गरेको छ। शुक्रबार राति ८ बजेसम्म खुल्ला गरिएको भोटिङका लागि विद्यालयले रकम सोझै परिवारलाई हस्तान्तरण गरेको हो।
विद्यालयका प्रधानाध्यापक आलोक श्रेष्ठले राजेशका पिता जनक परियारलाई १४ हजार रुपैयाँ बिहीबार हस्तान्तरण गरे। शुक्रबार प्रसारण हुने ‘भ्वाइस किड्स’बाट उत्कृष्ट १६ जना छनोट हुनेछन्।
राजेशलाई विजेता बनाउनका लागि विद्यालयबाटै अभियान शुरु गरिएको शिक्षक प्रदीप ठकुरीले जानकारी दिए। राजेश हिमालयन स्कुलमा कक्षा ६ मा अध्ययनरत छन्। हाल उनी रियालिटी सोका लागि काठमाडौमा छन्। शुक्रबार राति ८ बजेसम्म भोट गर्ने समय खुला रहने छ।