सुनसरी- धुलोका कारण बराहक्षेत्र नगरपालिका-१ खहरे एकता चोक हुँदै हाइवे निस्कने बाटोमा स्थानीय बासिन्दाले ढाट तेर्स्याएर अवरोध गरेका छन्।
स्थानीय राजु तामाङका अनुसार उक्त सडक हुँदै दैनिक हजारौं संख्यामा यातायातका साधन आवतजावत गर्छन्। तर, त्यसका कारण उड्ने धुलो नियन्त्रण गर्न कसैले चासो नदिँदा स्थानीय बासिन्दाले रोगको शिकार बन्नु परिरहेको छ।
धुलोका कारण ज्येष्ठ नागरिक, दमका रोगी, सुत्केरी, बालबालिकाहरू बढी प्रभावित छन्। त्यसैले रहरले नभई बाध्य भएर ढाट तेर्स्याउँदै राज्य र स्थानीय सरोकारवाला निकायको ध्यानाकर्षण गराएको उनले बताए।
खहरे र एकता चोकबीच करिब १०० मिटर सडक हालसम्म कालोपत्रे भएको छैन। हाइवे हुँदै खहरे, एकता चोक, चतरा, बयरवन बजार जाने सडक खहरे र एकता चोकमा हिजो शुक्रबारदेखि ढाट लगाएपछि सवारी साधनमा आवतजावत गर्न यात्रुलाई समस्या भएको छ।
बयरवन बजार हुँदै बराहक्षेत्र, सप्तकोशी, नयाँ पुल जाने सवारी साधनहरूले लाल बस्तीको बाटो प्रयोग गरिदिन तामाङले आग्रह गरेका छन्।