सुनसरी- बराहक्षेत्र नगरपालिका-१ चावचा, बागदलबारीलगायतको नम्बरी जग्गा प्रयोग गरी कोकाहा खोलाको पानी धरान लैजाने अभियानमा लागेका धरानका मेयर हर्क सम्पाङ र बराहक्षेत्र नगरपालिका मेयर रमेश कार्कीबीच आज बराहक्षेत्र नगरपालिकामा औपचारिक छलफल भएको छ।
धरानका मेयर साम्पाङले छलफलको क्रममा बराहक्षेत्र नगरपालिका तथा स्थानीय सरोकारवालासँग सहकार्य, सहमति नगर्नु आफ्नो कमी कमजोरी र गल्ती भएको स्वीकार गरेको बराहक्षेत्र-१ वडाध्यक्ष किसन थापा मगरले जानकारी दिए।
नगर प्रमुख रमेश कार्की, वडाध्यक्ष मगर, वडा सदस्य कुमार भट्टराई, इलाका प्रहरी कार्यालय चक्रघट्टीका निरीक्षक राजेश दत्तलगायत टोलीले हिजो चावचामा पानीको पाइप बिछ्याएको स्थलगत अवलोकन गरेका थिए।
धनकुटा र सुनसरी सीमा भएर बहने कोकाहा खोलाबाट धरानमा खानेपानी लैजानका लागि मेयर साम्पाङको अभिनयमा श्रमदान गर्न हजारौं संख्यामा मानिसहरू बराहक्षेत्र-१ चावाचामा पाइप लिएर एकाएक पुगेपछि स्थानीयवासीले आपत्ति जनाएका थिए।
नगर प्रमुख कार्की, वडाका जनप्रतिनिधिहरूले स्थलगत अवलोकन गरिसकेपछि वडा नम्बर १ को भूमि मेयर साम्पाङको टिमले प्रयोग गर्दा स्थानीयवासी र स्थानीय सरकारसँग सहकार्य गरेर समाधान खोजिनुपर्ने बताएका थिए।
आज दुई पक्षबीच भएको छलफलमा स्थानीय सरोकारवाला बासिन्दाहरूसँग आवश्यक छलफल, सहकार्य गरेर मात्र काम शुरु गर्ने मौखिक सहमति भएको छ। वडा नम्बर १ को नम्बरी जग्गामा पाइप बिछ्याउदा हुने क्षतिको मूल्यांकन गरिसकेपछि मात्र काम अगाडि बढाउने सहमति भएको छ।
कोकाह खोलाबाट धरान पानी लैजाने योजनामा बराहक्षेत्र–१ वडा कार्यालय तथा स्थानीय बासिन्दाले अवरोध नगर्ने गरी आवश्यक सहकार्यको अभाव, धरान उपमहानगरपालिका र बराहक्षेत्र नगरपालिकाबीच एकअर्कामा छलफल नहुँदा समस्या सिर्जना भएको हो। आगामी दिनमा विकास निर्माणका काममा सहमति गरेर जाने विषयमा मेयर साम्पाङ सकारात्मक रहेको बराहक्षेत्रका मेयर कार्कीले बताए।
मेयर रमेश कार्कीले भने खानेपानीको पाइप बिछ्याउँदा दीर्घकालीन असर, वातावरणीय प्रभाव अध्ययनको विषयमा छलफल गरिने र त्यसका लागि जिल्ला समन्वय समिति र जिल्ला प्रशासन कार्यालयसँग समन्वय गरिने बताए।
बराहक्षेत्र-१ को नम्बरी जमिनमा पाइप बिछ्याउँदा स्थानीयवासी र स्थानीय सरकारसँग सहकार्य गरेर समाधान खोजिनुपर्ने माग स्थानीय बासिन्दाले गरेका थिए।