अबुधाबी- यूएईको राजधानी अबुधाबीस्थित एभरेस्ट ट्राभल एन्ड टुरिजमले नेपाली महिलाहरूको महान पर्व तीजको अवसरमा दर खुवाउने कार्यक्रम सम्पन्न गरेको छ ।
माइतीहरूले चेलीबेटीलाई बोलाएर दर खुवाउने परम्परालाई परदेशमा भए पनि निरन्तरता दिन एभरेस्ट ट्राभलले दर खाने–खुवाउने कार्यक्रम २७ अगस्टमा अबुधाबीको टुरिस्ट क्लब एरियामा सम्पन्न गरेको कार्यक्रमका सभापति तथा एभरेस्ट ट्राभल एन्ड टुरिजम एलएलसीका सञ्चालक सुमन पराजुलीले बताए ।
एभरेस्ट ट्राभलको आयोजना तथा ‘ब्लेकिङ स्टार क्लिनिङ एन्ड रियल स्टेट’को व्यवस्थापनमा मनाइएको उक्त कार्यक्रममा करिब ३६ जना चेलीबेटीले मिठामिठा परिकारहरू खाएर तीज गीतमा नाचगान गरेको कार्यक्रम संयोजक अञ्जु भट्टराईले जानकारी दिइन् ।
टुरिस्ट क्लबमा रहेको कार्यक्रम स्थल निःशुल्क उपलब्ध गराएर परदेशमा भए पनि नेपाली पहिचान र संस्कृतिलाई जोगाउन सहकार्य गरेको हल सञ्चालक तथा ब्लेजिङ स्टार कम्पनीका प्रबन्ध निर्देशक केशव कार्कीले बताए ।
यूएईका सबै सामाजिक र व्यावसायिक संस्थालाई आफ्नो कार्यक्रमस्थल निःशुल्क उपलब्ध गराउने वाचा गर्दै हल सञ्चालक कार्कीले परदेशमा भए पनि घरदेशको अनुभूति दिलाउन तीज कार्यक्रम सफल भएको जानकारी दिए ।
दर खुवाउने कार्यक्रममा १० जना माइतीले सहयोग गरेको र सहयोगी सबैलाई संयोजकको तर्फबाट अञ्जु भट्टराईले धन्यवाद दिइन् ।
