काठमाडौं– अस्ट्रेलियाको ठूलो शहर सिड्नीमा कोरोना भाइरस संक्रमण अत्यधिक फैलिएका क्षेत्रमा रात्रिकालीन कर्फ्यू घोषणा गरिएको छ । नेपालीहरूको राम्रा बसोबास रहेको सिड्नीमा जारी लकडाउन पनि लम्ब्याइएको छ ।
पछिल्लो समय सिड्नीमा ठूलो संख्यामा कोरोना संक्रमित बढिरहेका छन् । न्यु साउथ वेल्स सरकारले संक्रमण नियन्त्रणका भन्दै लामो समयदेखि लकडाउन जारी राखेको छ । तर, यसले पनि संक्रमण नियन्त्रणमा आउन सकेको छैन ।
शुक्रबार न्यु साउथ वेल्सकी प्रिमियर ग्लाडिस बेरेजिक्लियनले पछिल्लो केही दिनयता दैनिक ६ सयभन्दा धेरै संक्रमित देखिन थालेको भन्दै अहिले लम्ब्याइएको लकडाउनमा जनस्वास्थ्यका थप केही मापदण्ड थप गरिएको बताएकी छन् । उनले स्वास्थ्य र प्रहरीले एकसाथ काम गर्नुपर्ने बताएकी छन् ।
सिड्नीमा कोरोना संक्रमणको केन्द्रको रुपमा रहेको १२ काउन्सिल एरियामा बेलुका ९ देखि बिहान ५ बजेसम्मका लागि कर्फ्यू घोषणा गरिएको छ । उक्त क्षेत्रमा प्रवेश गर्ने जो कोहीलाई १४ दिनमा क्वारेन्टिनमा राखिने अधिकारीहरूले बताएका छन् ।
शुक्रबार न्यु साउथ वेल्समा कोरोनाका ६४४ नयाँ संक्रमित फेला परेका छन् । जसमध्ये अधिकांश सिड्नीका छन् । यसअघि बिहीबार न्यु साउथ वेल्समा ६८१ नयाँ संक्रमित थपिएका थिए ।
