काठमाडौं – नेपाली कांग्रेसका नेता प्रकाशमान सिंहले कम्युनिष्टहरुले कांग्रेसलाई सहयोगी पार्टीको रुपमा प्रयोग गर्न खोजेको बताएका छन् ।
शनिबार काठमाडौंको चन्द्रागिरी नगर समितिले आयोजना गरेको विचार गोष्ठीमा नेता सिंहले सो कुरा बताएका हुन् । जनता र देशलाई संकट पर्दा कांग्रेसले नै साथ दिने भन्दै नेता सिंहले कांग्रेस नै जनताको पार्टी भएको दाबी गरे ।
उनले आगामी १४ औं महाधिवेशनमा सभापति पदमा उम्मेदवारी दिने दोहोर्याए । सभापति पदमा उम्मेदवारी दिनबाट पछि नहट्ने उनको भनाइ छ । उनले भने, ‘आम जनताको दुखमा मलमपट्टी लगाउन भए पनि म कांग्रेसको सभापति बन्नु पर्छ, सबैलाई मिलाउन सक्ने मसँग क्षमता छ, पार्टी सञ्चालन गर्न सक्ने क्षमता छ, म किन पार्टी सभापति नबन्ने ? त्यसैले सभापतिको उम्मेदवारीबाट पछि हट्दैन ।’
सभापति शेरबहादुर देउवालाई लक्षित गर्दै उनले नेतृत्व गलत भएकाले नेपाली कांग्रेस अहिले इतिहासकै कमजोर अवस्थामा पुगेको बताए । क्षमता नभएका र काम गर्न नसक्नेलाई फेरि पनि मौका दिए आफ्नो खुट्टामा आफैं बञ्चरो प्रहार गरेसरह हुने उनले टिप्पणी गरे ।