काठमाडौं– दुई दशकभन्दा बढी समयदेखि बेलायतमा बसोबास गर्दै आएका कुल आचार्यले गैरआवासीय नेपाली सङ्घ (एनआरएनए) को केन्द्रीय अध्यक्षमा उम्मेदवारी दिने भएका छन् । पर्वतको धाइरिङमा जन्मिएका आचार्य हाल एनआरएनको सल्लाहकार छन् ।
एनआरएनको अध्यक्ष पदमा बद्रि केसी र रविना थापाले पनि उम्मेदवारी दिने घोषणा गरिसकेका छन् ।
गैरआवासीय नेपालीको सम्पत्तिको सुरक्षा, लगानी प्रवर्द्धन तथा सुरक्षित वैदेशिक रोजगारीका विषयलाई मुख्य एजेन्डा बनाउँदै आफूले उम्मेदवारी दिने आचार्यले बताए ।
उनले सन् २०२१–२०२३ कार्यकालका लागि निर्वाचित भएमा सबै गैरआवासीय नेपाली अटाउने संस्था बनाउन आफूले काम गर्ने बताए। सङ्घको दशौँ अधिवेशन आगामी अक्टोबर २३–२५ मा काठमाडौँमा हुन गइरहेको छ भने पहिलोपटक अनलाइन माध्यमबाट निर्वाचन हुने बताइएको छ ।
नेपाल सरकारले मान्यता दिएको एनआरएनए परराष्ट्र मन्त्रालयमा दर्ता छ । अहिले संसारभरि यसका सदस्यको सङ्ख्या एक लाख नाघेको बताइएको छ ।
‘एक पटकको नेपाली सधैँको नेपाली’ भन्ने मूल नारा बोकेको एनआरएनएले प्रवासमा रहेका नेपालीलाई एकजुट गर्दै उनीहरुसँग रहेको सीप, पूँजी र अनुभव नेपालको विकासमा उपयोग गर्ने उद्देश्य राखेको छ ।
