काठमाडौं- सेफ्स वर्गरको आठौं आउटलेट काठमाडौं उपत्यका बाहिर पनि सञ्चालनमा आएको छ।
कोशी प्रदेशको केन्द्र इटहरीनजिक मोरङको सुन्दर हरैचा नगरपालिका-४ बलिया बजारमा उक्त आउटलेट सञ्चालनमा ल्याइएको हो। फ्रेन्चाइज र फरक स्वाद चखाउन पूर्वमा पहिलो आउटलेट खोलिएको कम्पनीका सञ्चालक तीर्थ कटुवालले बताए।
बलिया बजार पछिल्लो समय आर्थिक कारोबारको केन्द्र बनेको छ। मोरङको पूर्वी भेगका ठूला बजारहरूबाट नजिक पर्ने भएकाले बलिया मुख्य व्यापारिक केन्द्रका रूपमा विकास भएको छ। र, त्यहीं सेफ्स बर्गरले आफ्नो आउटलेट सञ्चालनमा ल्याएको छ।
अर्का सञ्चालक महेन्द्र तामाङका अनुसार फ्रेन्चाइज आउटलेटमा सेफ्स बर्गरको खाना सम्बन्धित लगानीकर्ताले सर्भ गर्न थालेका हुन्। अहिले काठमाडौं उपत्यकामा सञ्चालित सातवटा आउटलेटमा सेफ्स बर्गरमा पाइने खाना नै त्यहाँ पनि पाइनेछ। यसमा कम्पनीले नै मनिटर गर्ने हो।
फुड क्वालिटी, अप्रेसन म्यानेजमेन्ट सेफ्स बर्गर प्रालिबाटै हुन्छ। ‘झापा, धरान, विराटनगरजस्ता मुख्य शहरहरूमा सेफ्स वर्गरलाई चिनाउन आउटलेट खोल्ने तयारीमा छौं,’ सञ्चालक कटुवालले भने, ‘इटहरीमा भव्य शुभारम्भपछि अब दमक र धरानमा खोल्ने योजना बनाएका छौं । कुन ठाउँमा पहिला खोल्ने भन्ने यकिन भएको छैन।’
ती सबै आउटलेटमा त्यहाँ बन्न नसक्ने मेजर ससहरू काठमाडौं चाबहिलस्थित मुख्य किचेनबाट पठाइने छ।
अहिले बलिया बजारमा लगानीकर्ताले सेफ्सबर्गरको आउटलेटका लागि झण्डै एक करोड रुपैयाँ लगानी गरेका छन्। उक्त आउटलेट आस्मा गुरुङको नाममा दर्ता छ भने मनिटरिङ अमृत गुरुङ र अम्बर गुरुङले गर्दैछन्।