सिंहदरबारको चहलपहलमा रमाएका
सिंह छतमा बसी गुनासो गर्दै थिए,
कता गए ती मन्त्री
कता गए ती हुलका हुल
पछि लाग्ने जन्त्री,
हुलका हुल आउने जनता
कता गए होलान्
कता हराएका होलान्,
किन बिर्से यता आउन
यतिकैमा ……
नजिकै बसेको कागले सुनेछ
र भनेछ
सेटिङमा चलेको राजनीति
स्वार्थमा बन्ने मन्त्री
स्वार्थको जोखना हेरिँदै छ रे,
मिलीजुली स्वार्थ मिलाउन
मने कमरेटलाई पनि
गाह्रो भो रे,
आशा गर
मोलमोलाइपछि
कुर्सीमा बस्ने आउने छन्,
सिंहदरबारको चहलपहल
पहिलाजस्तै हुनेछ,
कुर्सीमा बस्ने कारिन्दा
आफैं निर्णय गर्न नसक्ने
हैसियतका आउने छन्
निर्णय लिन पनि आफ्ना आकाको
आदेश कुर्ने छन्
सेटिङका रंगबिरंगी खेल
शुरु हुनेछ
स्वार्थको सेटिङ मिलाउन र तार काट्न
रातको अँध्यारोमा
सुट लगाएका मुसा आउने छन्
तिमी छतमा बसी
केही नबोली
तमाशा हेर्नू
हामीलाई चित्त नबुझे
उडी-उडी गाली गर्नेछौं
रिसै उठे पूरै काग सेना बोलाई
दिन रात सुन्नै नसक्ने गरी
गाली गर्नेछौं