काठमाडौं- भुटानका पूर्वगृहमन्त्री दागो छिरिङलाई जापानमा उच्च सम्मान प्रदान गर्न लागिएकोमा विश्वभरबाट भुटानी समुदायले विरोध गरेका छन्।
सन् १९९० पछि दक्षिण भुटानका हजारौँ नागरिकमाथि दमन र अत्याचार हुँदा छिरिङ गृहमन्त्री थिए। त्यतिबेला एक लाख २५ हजार भुटानी नागरिक देशनिकाला भएका थिए। तीमध्ये करिब एक लाख नेपालमा शरणार्थी बनेका थिए।
यसैबीच ‘भुटनिज क्याम्पेन कोअर्डिनेटिङ कमिटी फर जापान क्याम्पेन-२०२१’ ले जापान सरकारलाई २४ जुनमा पत्र पठाएर छिरिङलाई ‘अर्डर अफ द राइजिङ सन गोल्ड एन्ड सिल्भर स्टार’ उपाधि दिनु गलत हुने बताएको छ। यो अभियानका प्रवक्ता जोगेन गजमेरले छिरिङले यो सम्मान पाए भुटानमा तीन दशकअघि भएको दमनका पीडितमाथि थप अन्याय हुने उल्लेख गरे।
विभिन्न मुलुकमा पुनर्वासमा गएका भुटानी समुदायले जापान सरकारलाई निर्णय पुनर्विचार गर्न दबाब दिन अभियान चलाएका छन्। यो अभियानमा विभिन्न मुलुकमा रहेका ४६ भुटानी संघसंस्था सामेल भएका छन्।
सन् १९९३ यता नेपाल-भुटानबीच भएका वार्तामा कयौं पटक भुटानको नेतृत्व गरेका छिरिङ भुटानमा उठेको प्रजातन्त्र र मानवअधिकार प्राप्तिको आन्दोलन दबाउन निर्णयक मानिन्थे। त्यतिबेला छिरिङ नेतृत्वको गृह मन्त्रालय नै कठोर दमनको सूत्रधार थियो।
सन् १९९८ सम्म भुटानको गृहमन्त्री भएका छिरिङ त्यसपछि जापानका लागि राजदूत भएका थिए। जापानको सम्मान दिने घोषणाको अमेरिका, अस्ट्रेलिया, क्यानाडा, न्युजिल्यान्डलगायत मुलुकमा रहेका भुटानी समुदायले विरोध जनाएका छन्।