पाँच थान मल्टी प्यारामिटर प्यासेन्ट मनिटर र एक सय थान अक्सिमिटर पनि किनियो। भेन्टिलेटर र अक्सिजनसहितको सुविधासम्पन्न एम्बुलेन्स खरिद अभियानमा जुटे पाँचथरवासी।
पाँचथर- सदरमुकाम फिदिमस्थित पाँचथर जिल्ला अस्पतालमा अक्सिजन कन्सन्ट्रेटर र सिलिन्डर खरिदका लागि शुरु गरिएको अभियानमा हालसम्म करिब ५७ लाख रुपैयाँ जुटेको छ।
पाँचथर उद्योग वाणिज्य संघको अगुवाइमा उक्त अभियान ४ जेठदेखि शुरु भएको थियो। अभियानको पहिलो दिन नै पाँच लाख आठ हजार ६ सय ५३ रुपैया संकलन भएको थियो। जिल्ला, जिल्लाबाहिर र देशबाहिर रहेका पाँचथरवासी तथा पाँचथरप्रति सद्भाव रहेकाहरूले नगद सहयोग उपलब्ध गराएको संघका अध्यक्ष दीपक नेपालले जानकारी दिए।
व्यक्तिगत रूपमा सबैभन्दा बढी बेलायतबाट सूर्य नेम्बाङले एक लाख ३० हजार रुपैयाँ उपलब्ध गराए। संस्थागत ढंगबाट पाँचथर-अस्ट्रेलिया समाजले ११ लाख १८ हजार रुपैयाँ पठाएको छ।
शुरुमा करिब ३५ लाख रुपैयाँ लागत अनुमानका साथ अभियान सञ्चालन गरिएको थियो। सहयोग रकम बढ्दै जाँदा आइतबार मात्र ५४ लाख ६० हजार रुपैयाँको सामान खरिद गरिएको संघका अध्यक्षले नेपालले जानकारी दिए।
उनका अनुसार काठमाडौंस्थित एभरेस्ट ग्याससँग ५० थान अक्सिजन सिलिन्डर खरिद गरिएको छ। यस्तै, ग्लोबल टेक नामक कम्पनीसँग २० थान अक्सिजन कन्सन्ट्रेटर खरिद गरिएको छ। बायोन्टेक नेपालसँग पाँच थान मल्टी प्यारामिटर प्यासेन्ट मनिटर खरिद गरिएको छ।
५० थान सिलिन्डर आठ लाख रुपैयाँमा खरिद गरिएको हो। यस्तै, २० थान कन्सन्ट्रेटरको मूल्य ३७ लाख रुपैयाँ परेको छ भने पाँच थान मल्टी प्यारामिटर प्यासेन्ट मनिटर नौ लाख रुपैयाँमा खरिद गरिएको छ। यसैगरी, एक लाख ६० हजार रुपैयाँमा एक सय थान अक्सिमिटर खरिद गरिएको नेपालले जानकारी दिए।
‘यी सबै सामग्री पाँचथर अस्पताल र आवश्यकताअनुसार जिल्लाका सरकारी स्वास्थ्य संस्थालाई उपलब्ध गराइने छ,’ संघका अध्यक्ष नेपालले भने।
तत्कालका लागि लक्ष्य पूरा भए पनि जनस्तरबाट सुविधासम्पन्न एम्बुलेन्स खरिद गर्ने र त्यो पाँचथर उद्योग वाणिज्य संघले नै सञ्चालन गर्ने माग आएको छ। भेन्टिलेटर र अक्सिजन सिलिन्डरसहितको एम्बुलेन्स खरिदका लागि सहयोग अभियान जारी राखिएको नेपालले जानकारी दिए।