फिदिम- प्रदेश-१ का पूर्वआर्थिक मामिला तथा योजना मन्त्री इन्द्र आङ्बो ‘मौसम’को पहलमा फिदिमस्थित पाँचथर अस्पतालमा अक्सिजन बेडसहितको अस्थायी कोभिड अस्पताल सञ्चालनमा ल्याइएको छ।
त्यसका लागि पाँचथर उद्योग वाणिज्य संघको विशेष सहयोग छ। सुनसरी सोनापुरस्थित विनायक अक्सिजन इन्डस्ट्रीले अक्सिजनसहितका ठूला सिलिन्डर उपलब्ध गराएको पूर्वमन्त्री आङ्बोले जानकारी दिए। उनका अनुसार थप अक्सिजन सिलिन्डर व्यवस्थापनको काम जारी छ।
‘अक्सिजन अभावमा कोरोना संक्रमितले देश विदेशमा ज्यान गुमाउनुपरेको दुःखद् परिदृष्य कतै बेहोर्न नपरोस्। यो संकटको व्यवस्थापनमा लाग्ने उद्योग वाणिज्य संघ पाँचथर परिवार, विशेषतः अध्यक्ष दीपक नेपाल र व्यवस्थापन गर्न विशेष सहयोग गर्ने युवा नेता तथा उद्योगी मदन चुडाललाई विशेष धन्यवाद दिन चाहन्छु,’ आङ्बोले भनेका छन्, ‘जिल्लावासीलाई कोरोना महामारीबाट बचाउने हाम्रो प्रयत्न र अभियान जारी रहने छ।’
उवासंघ अध्यक्ष नेपालका अनुसार पाँचथर अस्पतालमा अक्सिजन बेडसहितको अस्थायी कोभिड अस्पताल सञ्चालनका निम्ति ६.८ क्युबिक मिटरका २० थान अक्सिजनसहितका सिलिन्डरहरू फिदिम पुग्दैछन्।
‘अत्यन्तै अभावको यो घडीमा पनि अक्सिजन सिलिन्डर उपलब्ध गराउने विनायक अक्सिजन इन्डस्ट्रिज सोनापुर र उक्त उद्योगका सञ्चालक पवन सारडा, यो व्यवस्थापनमा अभिभावकीय भूमिका निर्वाह गरिदिनु हुने प्रदेश-१ का पूर्वआर्थिक मामिला तथा योजना मन्त्री इन्द्र आङ्बो ‘मौसम’प्रति हार्दिक कृतज्ञता व्यक्त गर्छौँ,’ अध्यक्ष नेपालले भने।