कोलकाता- उच्च अदालतले पश्चिम बंगाल राज्यका कारागारहरूमा बन्द तर अदालती अभ्यासमा सामेल हुन नसकेका कैदी-बन्दीको सूची तत्काल उपलब्ध गराउन सरकारलाई आदेश दिएको छ।

उच्च अदालतका मुख्य न्यायाधीश टीबी राधाकृष्णन र न्यायाधीश अनिरुद्ध रायको डिभिजन इजलासले यस्तो आदेश दिएको हो।

नेपालको इलामका दुर्गाप्रसाद तिम्सिनालाई ४१ वर्षसम्म अदालतमा उपस्थितसमेत नगराई गैरकानूनी थुनामा राखिएको खुलासा भई उनलाई तत्काल रिहा गर्न हालै उच्च अदालतले आदेश दिएको थियो। तिम्सिनाको जस्तै समस्या बेहोरिरहेका कैदी-बन्दीको सूची तत्काल पेश गर्न उच्च अदालतले आदेश दिएको हो।

अदालतको डिभिजन इजलासले एडिसनल डीजी तथा कारागारहरू हेर्ने महानिरीक्षकका नाममा आदेश जारी गरेको छ। ती त्यस्ता बन्दी हुन्, जसविरुद्ध अदालतमा मुद्दा दर्ता गरिएको छ, यससम्बन्धी कारवाही पनि हुन्छ तर अभियुक्तहरू अदालतमा उपस्थित हुन सक्दैनन्। र, वर्षौँसम्म कसुर प्रमाणित नभई जेलमै सड्न बाध्य हुन्छन्।