दीपक नेपाल
धनगढी– बलात्कारपछि हत्या गरिएकी बैतडी दोगडाकेदार गाउँपालिका–७ चडेपानीकी १७ वर्षीया भागरथी भट्टको बलात्कार र हत्यामा संलग्नता आरोपमा एकजनालाई प्रहरीले पक्राउ गरेको छ ।
२१ माघमा विद्यालय गएकी भागरथीको भोलिपल्ट बिहीबार साँझ बीभत्स अवस्थामा शव फेला परेको थियो । शव फेला परेको १३ दिनपछि प्रहरीले त्यसमा संलग्नता आरोपमा तीन युवकलाई पक्राउ गरेको हो ।
हत्यारा पक्राउ नपरेसम्म शव नउठाउने भन्दै आफन्तले शव बुझेका छैनन् । दाहसंस्कार गरिए अपराधी उम्किन्छन् कि भन्ने आशंकाले शव उठाउन नसकिएको मृतकका आफन्तले बताउँदै आएका छन् । भागरथीको शवलाई जिल्ला अस्पताल बैतडीमा राखिएको छ ।
भागरथीको बलात्कारपछि हत्या भएको पोस्टमार्टम रिपोर्टले बताइसकेको छ । घटनापछि सुदूरपश्चिम प्रदेश प्रहरी प्रमुख डीआईजी उत्तमराज सुवेदी बैतडीस्थित खोचेलेकमा अनुसन्धानको लागि आफैँ खटिएका छन् ।
प्रहरी स्रोतका अनुसार घटनामा एकजना भन्दा बढीको संलग्नता हुन सक्ने आशंकाका कारण पक्राउ परेका उपर सोधपुछ भइरहेको छ ।