सुनसरी- स्वर्णिम साहित्य समाज बराहक्षेत्रद्वारा नयाँ सिर्जना खोजी कार्यक्रमअन्तर्गत आयोजित ‘स्कुलमा कविता २०७९’को दोस्रो अडिसनमा सम्पन्न भएको छ।
बराहक्षेत्र-२ स्थित बीपीप्रा आधारभूत विद्यालयमा भएको अडिसनमा औलिया माविमा अध्ययनरत दीपेन भण्डारीले ‘मेरी आमा’ शीर्षकको कविता वाचन गरेर प्रथम भएका थिए।
यस्तै, राधाकृष्ण विद्यापिठमा अध्ययनरत छात्र हरि आचार्यले ‘आचारको महिमा’ शीर्षकको कविता वाचन गरेर दोस्रो भए। आदर्श माविका रविन कटुवालले तेस्रो स्थान हासिल गरे।
सो प्रतिस्पर्धाबाट दीपेन भण्डारी र हरि आचार्य छनोट भएका हुन्। उनीहरूलाई फाइनल चरणका लागि प्रवेश कार्ड प्रदान गरिएको छ।
बराहक्षेत्र नगरभरिका विद्यालयहरूमा ४ स्थानमा प्रतियोगिता गरिने आयोजकले जनाएको छ।
हतुवागढी गाउँपालिका-८ का पूर्वजनप्रतिनिधि तथा युवा समाजसेवी प्रमुख आतिथि सुदन राईले भने, ‘साहित्यले समाज राष्ट्रलाई सुधार र परिवर्तन गर्नका लागि महत्त्वपूर्ण भूमिका निर्वाह गरेको छ। स्वर्णिम साहित्य समाजले सिर्जनामुखी कार्यक्रम गरी नयाँ पुस्ताका कवि, कवियत्रीहरूको प्रतिभा पहिचान गर्ने जमर्को गरेकामा खुशी लागेको छ।’
सोही कार्यक्रममा स्वर्णिम साहित्य पुरस्कार तथा सम्मान अक्षय कोष स्थापना निम्ति पात्लेपानी साहित्य प्रतिष्ठान हतुवागढीका संस्थापक विश्वजित राईले नगद १० हजार रुपैयाँ हस्तान्तरण गरे।
तेस्रो अडिसन ६ फागुनमा महेन्द्र मावि चक्रघट्टीमा हुनेछ। प्रतियोगितामा छनोट भएका १० जना कविहरूबीच २ वैशाखमा अन्तिम प्रतिस्पर्धा गराइने छ। प्रथम हुनेलाई १० हजार रुपैयाँसहित ट्रफी, मेडल प्रदान गरिने छ। दोस्रो हुनेले ५ हजार रुपैयाँसहित प्रमाण पत्र र तेस्रो हुनेले ३ हजार रुपैयाँसहित प्रमाण पत्र प्राप्त गर्नेछन्।
प्रतियोगिताभरि निर्णायक मण्डलमा साहित्यकार तथा कवि प्रह्लाद पहरेदार, राजन इशारा राई र सविता फागो लिम्बू रहने छन्। पहिलो चरणबाट स्काई इंग्लिस स्कुलकी पुष्पा घिमिरे प्रथम र मुन बिम एकेडमीकी इशा सुवेदी दोस्रो भई छनोट भएका थिए।