सुनसरी- सफारी दुर्घटनामा परी ओछ्यान थला परेपछि बराहक्षेत्र नगरपालिका-२ बयरवन बजार ओम शान्ति पछाडि घर भएका पदमकुमार मगरले उपचार गर्न आर्थिक सहयोगको लागि याचना गरेका छन्।
गत १ माघमा सप्तकोशी नदी किनारमा मलामी जाने क्रममा सफारी दुर्घटना भई कम्मरमुनिको देब्रेपट्टीको हड्डी चर्किएपछि पदम आर्थिक अभावका कारण औषधि उपचार गर्न नसकी ओछ्यानमै थला परी घरमै छन्।
घरको आर्थिक अवस्था नाजुक र जर्जर भएको र कमाउने श्रीमान नै दुर्घटनामा परेर थला परेपछि उनकी श्रीमती देवकुमारी मगर तनावमा छिन्। उनले एक सय वर्षे सासुआमा, ६ वर्षका छोरा प्रमेश र ४ वर्षकी छोरी प्रमिशासहित अशक्त बनेका श्रीमानको पनि स्याहार सुसार गर्नु परिरहेको छ।
पदमकी वर्ष १०० की वृद्ध आमा
देवकुमारीका अनुसार श्रीमानको उपचारका लागि आफू बसिरहेको घरजग्गा बैंकमा राख्न पनि उक्त जग्गा अर्काको नाममा छ। उनीहरू सुकुम्बासी परिवार हुन्।
चिकित्सकहरूका अनुसार पदमको उपचार गर्न छिट्टै अस्पताल लैजानुपर्छ। तर, रकम अभावका कारणले अस्पताल लान नसकेको उनले बताइन्।
एक्स रे गर्दा कम्मरमुनि देब्रेपट्टीको हड्डी चर्किएको चिकित्सकले बताएका छन्। जसले गर्दा पदम हिँडडुल गर्न नसकेर ओछ्यानमै अहिले थला परेका छन्।
दुर्घटनामा पर्नुअघि पदम मगर ठेलामा चाउमिन, मःमः, चटपटेलगायत बिक्री गर्ने सानोतिनो व्यवसाय गर्दै घर खर्चदेखि वृद्धा आमाको स्याहारसुसार गरिरहेका थिए। उनी पनि हिँडडुल गर्न नसक्ने अशक्त छिन्।
मनकारी दयालु, महानुभावहरूले श्रीमान पदमको उपचार गर्न आफनो गच्छेअनुसार सकेजति आर्थिक सहयोग गरिदिन देवकुमारीले आग्रह गरेकी छन्।
आर्थिक सहयोग गर्न चाहानु हुने महानुभावहरूका लागि सम्पर्क नम्बरः
पदम मगर ९८२०३०२०७१
श्रीमती देवकुमारी मगर ९८२९३६५९९१