काठमाडौं- राष्ट्रिय उपभोक्ता मञ्चले मूल्यवृद्धिको एक वर्ष नबित्दै फेरि दूधको मूल्य बढाउनु गैरकानूनी भन्दै डेरी एशोसिएशन लगायत डेरी उद्योगहरूमाथि कारबाही गर्न माग गरेको छ।
मञ्चले प्रधानमन्त्रीलाई कारबाहीको माग गर्दै पत्र समेत पठाएको जनाएको छ ।
मञ्चले प्रधानमन्त्रीलाई लेखेको पत्रमा नेपाल डेरी उद्योग संघ र संघ आबद्ध डेरीहरूले लिटरमै १४ रुपैयाँ भाउ बढाएर उपभोक्ता मूल्य नै प्रतिलिटर सय रुपैयाँ पुर्याएर ठूलो आर्थिक भार पर्न गएको उल्लेख गरेको छ।
२०७८ माघ महिनामा ६० रुपैयाँबाट प्रतिलिटर ८६ रुपैयाँ पुर्याएको एक वर्ष पनि नबित्दै फेरि लिटरमा १४ रुपैयाँ बढाउने निजी क्षेत्रको काम राष्ट्रिय दुग्ध ऐन र नीति नियम विपरीत हो। एक पटक मूल्य बढाएको मितिले कम्तीमा दुई वर्ष मूल्यवृद्धि गर्न नपाउने नियम निजी क्षेत्रले उल्लंघन गरेको छ।
दूग्ध उत्पादक सहकारी संघ राष्ट्रिय दुग्ध विकास बोर्ड तथा अन्य सरोकारवाला निकायहरूलाई कुनै जानकारी नदिइ एक्कासि नेपाल डेरी उद्योग संघले उपभोक्ता मूल्य १४ रुपैयाँ बढाएर प्रतिलिटर १०० रुपैयाँ पुर्याउनु गैरकानूनी हो, पत्रमा भनिएको छ ।
मञ्चका अध्यक्ष प्रेमलाल महर्जनले डेरी उद्योग तथा नेपाल डेरी उद्योग संघबाट गरेको मूल्य वृद्धि तत्काल फिर्ता लिन लगाउन र गैरकानूनी कार्य गर्नेलाई कारबाही गर्न माग गरिएको जनाएका छन् ।
