काठमाडौं- नेपालीले सन् १९४९ मा भएको मलाया युद्धमा देखाएको वीरताको कथामा फिल्म बनेको छ।
मिलन चाम्सको निर्देशनमा तयार भएको फिल्म ‘गोर्खा वारियर’ले मलाया युद्धको कथा भन्छ। यस फिल्ममा गोर्खा सैनिकले देखाएको बहादुरीसँगै युद्ध लडेको सैनिकको जीवनी प्रस्तुत गरेको छ।
‘सैनिकले के कस्तो अवस्थामा युद्ध लडेका थिए भन्ने यसमा देखाएका छौं। उनीहरूको परिवार र जीवनीसमेत समेटेका छौं,’ चाम्सले भने, ‘हामीले नेपालीले कायम गरेको वीरताको कथा फिल्ममार्फत विश्वलाई भन्नुपर्छ।’
उक्त फिल्मको टिजर सार्वजनिक गरिएको छ। जंगल युद्धलाई देखाउँदा कठिनाइ भएकै कारण निर्माणमा लामो समय लागेको निर्देशक चाम्सले जानकारी दिए।
‘म आफैँ पूर्वसैनिक भएकाले पनि यसमा युद्ध लड्ने प्राविधिक शैली नै देखाएका छौं। अन्य फिल्मजस्तो एउटा हिरोले नभई सम्पूर्ण टिमले वास्तविकझैं यसमा युद्ध लड्नेछन्,’ चाम्सले भने।
नेपालीसहित हिन्दी र अंग्रेजी भाषामा प्रदर्शन हुन लागेको फिल्मको सन् २०२३ मा बेलायतमा प्रिमियर हुँदैछ।
फिल्ममा रितेश चाम्स, विजय लामा, रेविका गुरुङ, रियर राई, कविता आले, सुरज तमु, भुवनसिंह राई, त्रिचु राई, दिग्गज खत्री, सरोज खालिङ, अरुष सरु मगर, आशिष गुरुङलगायतको अभिनय छ।
विजय लामा सैनिक मेजरको भूमिकामा छन्। नेपाल र मलेशियामा छायांकन गरिएको फिल्ममा निर्देशक चाम्स र गिरिराज घिमिरेको लेखन, अर्जुन जीसीको सम्पादन, सुदीप बरालको डीओपी, हिमाल केसीको द्वन्द्व निर्देशन, समीर मियाँको भीएफएक्स, शैलेन्द्र खनालको गीत रचना र एलिस कार्कीको संगीत छ।