सुनसरी- बराहक्षेत्र नगरपालिकाभित्र रहेका पत्रकारहरूको साझा संस्था ग्रामीण पत्रकार समूहमा सम्झदारी हुन नसक्दा चुनाव हुने भएको छ।
समूहको २४ पुसमा हुन गइरहेको चुनावमा प्रेस युनियनबाट २ जनाले अध्यक्ष दाबी गरेका छन् । दाबी गर्नेहरूमा बाबुराम कार्की र दीपक पुरी छन्।
स्रोतका अनुसार अध्यक्ष उमेदवार कार्कीलाई नेपाल पत्रकार महासंघ केन्द्रीय सदस्य भिषण राईको साथ र समर्थन छ भने पुरीलाई नेपाल पत्रकार महासंघ सुनसरी जिल्ला सदस्य र प्रेस युनियन नगर कमिटी अध्यक्ष संगम बिष्टको प्रत्यक्ष साथ र समर्थन देखिएको छ।
प्रेस चौतारीबाट अध्यक्षका एक्ला उमेदवार अर्जुन श्रेष्ठ तथा ग्रामीण पत्रकार समूहका निवर्तमान अध्यक्ष हिरण्य कार्कीको उम्मेदवारी परेको निर्वाचन समितिका सदस्य नवराज बिष्ट जानकारी दिए।
संस्थापक अध्यक्ष भइसकेको बाबुराम कार्कीले पुनः अध्यक्षमा दाबी गर्नुले पनि केही रहस्य रहेको अडकल काट्न सकिने पत्रकार र बराहक्षेत्रका बासिन्दामाझ चर्चाको विषय बनेको छ ।
बराहक्षेत्रको पत्रकारिता नजिकबाट नियाल्दै आएका सोम राई भन्छन्, ‘आफैं बोक्सी आफैं धामी तथा आ-आफ्नो गुट–उपगुट र अवसरवादी चरित्र भएका व्यक्तिका कारण स्वतन्त्र, निष्पक्ष पत्रकारिता नभएकोमा दुःख लाग्छ । १-२ जनाबाहेक प्रायः पत्रकारहरू कुनै न कुनै राजनीतिक पार्टीमा आवद्ध देखिएका छन्।’
केही पत्रकारलाई बराहक्षेत्र नगरपालिकाभित्र जान, काम गराउन असजिलो भएका कारण ग्रामीण पत्रकारको अध्यक्षको माध्यमबाट प्रस्ताव पेश गरेर काम गर्न सजिलो बनाउन आ-आफ्नो पक्षका अध्यक्षका उम्मेदवारलाई जिताउने हरप्रकारको रणनीतिमा केही व्यक्ति खुलेर लागेका छन्।
ग्रामीण पत्रकार समूहको अध्यक्ष पदमा प्रेस चौतारीको निर्णायक मत देखिएको छ। ०७४ सालमा स्थापना भएको समूहका संस्थापक अध्यक्ष बाबुराम कार्की तथा निवर्तमान अध्यक्ष हिरण्य कार्कीले पत्रकार हक, हित र अधिकारका लागि केही राम्रो उपलब्धीमुलक काम गर्न नसकेको आरोप लगाउँदै स्थानीय महिला पत्रकार विमला घिमिरे ग्रामिण पत्रकार समूह दर्ता गर्न उल्लेखनीय भूमिका वहन गर्दै पैसा फिर्ता पाउने शर्तमा व्यक्तिगत लगानीमा समूह दर्ता गरेको तथा राजनीतिक कारण आफूलाई अध्यक्ष बाबुराम कार्कीले कोषाध्यक्ष पदबाट निश्कासन गरेको बताउँछिन् ।
हालसम्म ग्रामीण पत्रकार समूहको सदस्य लिनेहरूको संख्या ३० छ। ग्रामीण पत्रकार सञ्जालको सूत्रपात र स्थापना गर्ने पत्रकार हिमाल राईको टिमलाई प्रशंसा गर्दै समूहले आत्मसात गरेको छ।