काठमाडौं- संसदमा विचाराधीन रहेको महाभियोग प्रस्तावमा संसद सचिवालयका महासचिवले सफाइ दिएको विषयमा सर्वोच्च अदालतले उनीमाथि चारवटा गम्भीर प्रश्न सोधेको छ।

सर्वोच्च अदालतका न्यायाधीशहरूको बुधबारको पूर्ण बैठकको निर्णयअनुसार सर्वोच्चले संसदका महासचिव भरतराज गौतममाथि प्रश्न सोधेको हो। स्रोतका अनुसार यथास्थितिमा निलम्बित प्रधानन्यायाधीश चोलेन्द्रशम्शेर जबरालाई अदालतमा प्रवेश गर्न दिन नसकिने निष्कर्ष न्यायाधीशहरूको बैठकमा निस्केको छ।

यस्ता छन् संसदका महासचिवमाथि सर्वोच्चका प्रश्न

(१) २०७८ फागुन १ मा दर्ता भएको महाभियोग प्रस्तावका सम्बन्धमा महाभियोग सिफारिस समितिबाट प्रतिनिधिसभामा पेश भएको भनिएको प्रतिवेदनउपरको कारवाहीको निरन्तरता अहिले कायम छ वा छैन ?

(२) नयाँ प्रतिनिधिसभामा सो प्रस्ताव पेश हुन्छ वा हुँदैन ?

(३) महाअभियोग प्रस्ताव तत्कालीन प्रतिनिधिसभाको कार्यकाल सम्माप्त भएको मितिले निष्प्रभावी भएको हो ? वा निर्वाचनको मितिले ?

(४) नवनिर्वाचित प्रतिनिधिसभाले कार्य प्रारम्भ नगर्दैको अवस्थामा कुन संवैधानिक वा कानूनी व्यवस्थाको आधारमा महासचिवले महाअभियोग निष्प्रभावी भएको भनी उल्लेख गर्नु भएको हो ?