काठमाडौं- भोजपुर षडानन्द नगरपालिका-३ की हिमालय राईले साल्पासिलिछो गाउँपालिकाका पूर्वअध्यक्ष महेश राईले विवाह गरेर आफूलाई श्रीमती अस्वीकार गरेको बताएकी छन्।
शुक्रबार रिपोर्टर्स क्लबमा पत्रकार सम्मेलनमार्फत राईले राज्य पनि आफूविरुद्ध लागेको आरोप लगाइन्।
हिमालयका अनुसार १३ मंसिर ०७८ मा महेश राईसँग उनको विवाह थियो। आफन्तको उपस्थितिमा सामाजिक परम्पराअनुसार उनीहरूको विवाह भएको थियो।
तर, आफूलाई श्रीमती अस्वीकार गर्ने महेशको पक्षमा लागेर राज्यले आफूलाई असहयोग गरिरहेको उनले बताइन्।
विवाह भएको यथेष्ट प्रमाण हुँदाहुँदै पनि प्रहरीले प्रमाण नपुगेको भनेर मुद्दा अघि नबढाएकोमा उनले आपत्ति जनाइन्। विवाह गरेको प्रमाणित गर्न नसकेकाले कानूनी प्रक्रियामा जान नसकेको उनको भनाइ छ। महेशले कांग्रेस केन्द्रीय सदस्य माया राईसँग दोस्रो विवाह गरी आफूमाथि अन्याय गरेको उनले बताइन्।
धेरै लामो मिहिनेतपछि पाटन उच्च अदालतमा न्यायका लागि निवेदन दिएको उल्लेख गर्दै उनले अदालतले परमादेश जारी गरेपछि बल्ल प्रहरीले जाहेरी दर्ता गरेको बताइन्।
‘बयानको आधारमा सरकारी वकिल र प्रहरी मिलेर पीडकलाई गत कात्तिक २० मा पक्राउ गरेको जस्तो गरेर एकदिन मात्र थुनेर छाडियो। यसमा हाम्रो आपत्ति हो,’ उनले भनिन्, ‘हामीसँग विवाहको सबै प्रमाण छ। प्रहरीलाई कानूनअनुसार मुद्दा अघि बढ्ने र पीडकलाई छाडिदिनु भनेर चिठ्ठी आएपछि तुरुन्तै उहाँलाई छाडियो तर पछि मुद्दा अघि नबढ्ने भनियो।’
गत १ मंसिरमा सरकारी वकिलले यथेष्ट प्रमाण नपुगेकोले यो मुद्दा अघि नबढ्ने जानकारी पाएपछि हिमालयन राई झनै विक्षिप्त बनेकी छन्। आफूसँग विवाह पृष्टि हुने यथेष्ट प्रमाण रहेको उनले दाबी गरिन्। र, आफूलाई न्याय दिन सम्बन्धित निकायसँग आग्रह गरिन्।
हिमालयले १३ मंसिर ०७८ मा विवाह गरेर महेशले आफूलाई काठमाडौं बुढानीलकण्ठ–१० कपनमा भित्र्याइएको उनले बताइन्।
विवाहको भोलिपल्ट १४ मंसिरमा सुष्मा राई, योगेन्द्र राई, सुयोङमी रार्ई, सुनिता लोप्चन, महेश राई, सञ्जय भन्ने सरोज राईसहित ७ जना साथी र आफन्तसँग नगरकोट घुम्न गएको भन्दै होटलमा बस्दा खिचेको भिडियो अहिले पनि ब्लगमा सुरक्षित रहेको बताइन्।
कांग्रेसका नेता तथा गाउँपालिकाका तत्कालीन अध्यक्ष महेशसँगै वैवाहिक कार्यक्रमपछि कांग्रेसको महाधिवेशनका लागि विराटनगर, इटहरीका विभिन्न होटलमा बसेर काठमाडौंसँगै फर्किएको उनले बताइन्।
काठमाडौं फर्किएलगत्तै काठमाडौंमा महेशकी स्वर्गीय जेठी श्रीमती सरस्वती राईकी छोरी श्रेयासँगै बस्दै आएको र सोही क्रममा १६ फागु ०७८ मा घरमा काम गर्ने बहिनीको साथमा कामका लागि बाहिर गएर फर्किंदा गेट भित्रबाट बन्द भएको उनले बताइन्। घरभित्र फोन गर्दा महेश राईले भित्र पस्न नदिनु भनेकोले गेट बन्द गरिएको जवाफ आएसँगै आफू प्रहरी वृत्त बौद्ध पुगेको उनले जानकारी दिइन्।
विवाह गराउने (कुटुनी) मालती राईले हिमालय राईको विवाहको साक्षी आफू नै भएको बताइन्। महेशले नै मन पराएर विवाह भएको उनको भनाइ छ। उनले भनिन्, ‘महेशकी जेठी श्रीमतीको मृत्यु भएको ६ महिनापछि विवाहको कुरा आयो र हामी अघि बढ्यौं। महेशले मेरो श्रीमानसँग विवाह गर्ने कुरा गर्नुभएको रहेछ। बहिनीलाई देखाइयो र उहाँले पनि मन पराएपछि विवाह भएको हो।’