प्योङयाङ- उत्तरकोरियाका शासक किम जोङ-उनले आफ्नो मुलुकलाई संसारकै ठूलो परमाणु शक्ति बनाइने बताएका छन्।
उत्तरकोरियाको सरकारी समाचार एजेन्सी केसीएनएका अनुसार इन्टरकन्टिनेन्टल ब्यालेस्टिक मिसाइल परीक्षणमा सहभागी सैन्य अधिकारी र वैज्ञानिकहरूलाई पदक वितरणका लागि आयोजित समारोहमा किमले उक्त खुलासा गरेका हुन्।
आफ्नो सरकारले संसारको सबैभन्दा शक्तिशाली रणनीतिक हतियार बनाएको र त्यसबाट संसारकै शक्तिशाली सेना बन्न हौसला प्राप्त भएको उनले बताए। र, यस रणनीतिमा अझ अगाडि बढ्ने उद्देश्य रहेको पनि उनले खुलाए।
यस समारोहमा उनी आफ्नी छोरीसँग दोस्रोपटक देखिएका थिए। यसअघि १८ नोभेम्बरमा उनी ह्वासाङ–१७ मिसाइल परीक्षणका क्रममा पहिलोपटक आफ्नी छोरीका साथ देखिएका थिए।
उत्तरकोरियाले यस मिसाइललाई राष्ट्रिय हिरो संज्ञा दिएको छ। र, उत्तरकोरिया परमाणु शक्ति बन्नका लागि पूर्ण रूपमा तयार भएको किमको दाबी छ।
उक्त मिसाइल परीक्षणका लागि संयुक्त राष्ट्रसंघले लगाएको प्रतिबन्धका बावजुद किम पछाडि हटेनन्। त्यसपछि पनि लगातार परीक्षण गराइरहेकै छन्।