काठमाडौं– २७ जना उम्मेदवार रहेको काठमाडौं क्षेत्र नं–२ मा महिला उम्मेदवारलाई मात्रै हेर्ने हो भने मुख्यगरी तीन महिला उम्मेदवार चर्चामा छन् । तीमध्येकी एक हुन्, पहिलोपटक निर्वाचनमा भाग लिएको राष्ट्रिय स्वतन्त्र पार्टीकी सोविता गौतम । यस्तै, रोल्पा छाडेर काठमाडाै‌ रोजेकी माओवादी केन्द्रकी ओनसरी घर्ती र राष्ट्रिय प्रजातन्त्र पार्टीकी कुन्तीदेवी पोखरेल उपाध्याय ।

यी तीन उम्मेदवारमध्ये घर्ती गठबन्धनतर्फकी उम्मेदवार हुन् । समाजसेवी र युवा उद्यमी राप्रपाकी पोखरेल र अधिवक्ता समेत रहेकी राष्ट्रिय स्वतन्त्र पार्टीकी गौतम भने मतदाताका लागि नौलो अनुहार हुन् । त्यसो त घर्ती पनि रोल्पा छोडेर काठमाडौं आएकाले काठमाडौं क्षेत्र नं २ का मतदाताका लागि नयाँ अनुहार नै हुन् ।

तिनै महिला उम्मेदवारमध्ये अहिले बढी चर्चामा भने गठबन्धन तर्फकी उम्मेदवार घर्ती र राष्ट्रिय स्वतन्त्र पार्टीकी गौतम छन् । घर्ती पूर्वसभामुख भएर काम गरेको अनुभवी र गठबन्धनको साथ पाएकाले चुनाव जित्नेमा ढुक्क छिन् भने गौतम मतदाताले पुरानो भन्दा नयाँ अनुहार खोजिरहेकाले र आफू मतदाताको माग अनुसारको योग्य उम्मेदवार भएकाले चुवाव जित्नेमा ढुक्क रहेको बताउँछिन् ।

अहिले सबै उम्मेदवार मतदातासँग भेटघाट गर्ने, उनीहरुका आशा, अपेक्षा र भोट आफुले पाउने कि विपक्षी पार्टीतर्फ जाने रहेछ भनेर मतदाताको मनसाय बुझ्न व्यस्त छन् । घर्ती र गौतम दुवैले आ–आफ्नै तरिकाले मत माग्न मतदाताको घरदैलोमा पुगेका छन् ।

घर्तीले खानेपानीलाई मुख्य चुनावी एजेन्डा बनाएकी छन् । ट्राफिक व्यवस्थापन, सड्क, उक्त क्षेत्रमा रहेको सास्कृतिक पक्षको विकास र सफा सुन्दर र दिगो शहर बनाउने उनको मुख्य एजेन्डा छन् । उनले जस्तै गौतमले पनि खानेपानी, ढल, सडक व्यवस्थापनका मुद्दा अगाडि सारेकी छन् । शिक्षा, रोजगारी जस्ता कुरामा स्थानीय तहले कार्यन्वयन गर्न सक्नेखालका नीति तथा कानुन बनाउन पहल गर्ने लगायतका एजेन्डाका साथ उनी मतदातासमक्ष पुगेकी छन् ।

दुई महिला उम्मेदवारका बीच फुँयाल

यसअघिको निर्वाचनमा विजयी भएका दल र चुनावी अंकगणित हेर्ने हो भने काठमाडौं क्षेत्र नम्बर २ मा मुख्य प्रतिस्पर्धामा घर्तीसँग राष्ट्रिय स्वतन्त्र पार्टीकी गौतमभन्दा एमालेका उम्मेदवार मणिराम फुँयाल देखिएका छन् ।

काठमाडौ क्षेत्र नं २ भित्र शंखरापुर नगरपालिका, कागेश्वरी मनोहरा नगरपालिकाको ४ देखि ९ सम्मका वडा र काठमाडौ महानगरपालिकाको ९ र ३२ वडा पर्दछ । २०७४ सालको निर्वाचनमा यो क्षेत्रबाट वामगठबन्धनका उम्मेदवार नेकपा एमालेका वरिष्ठ नेता तथा पुर्वप्रधानमन्त्री माधवकुमार नेपाल २७ हजार ३३६ मत ल्याएर विजयी भएका थिए । एमालेसँग काँग्रेस पराजित भएका थिए । यसअघिको निर्वाचनलाई फर्केर हेर्दा यहाँका मतदाताले एमाले र कांग्रेसलाई आलोपालो गरेर जिताएको देखिन्छ ।

गत स्थानीय तहको निर्वाचनलाई हेर्ने हो भने नेकपा एमाले अगाडि देखिन्छ । एमालेले १७ हजार ३२८ मत प्राप्त गर्दा नेपाली काँग्रेसले १४ हजार १२८, नेकपा (एकीकृत समाजवादी) ले ७ हजार ९११, राष्ट्रिय प्रजातन्त्र पार्टी (राप्रपा) को ७ हजार २०० मत थियो । अहिले उम्मेदवार बनाएको माओवादी केन्द्रले सबैभन्दा कम ३ हजार १३१ मत पाएको थियो ।

तर, अहिले घर्ती सत्ता गठबन्धनबाट उम्मेदवार बनेकाले गठबन्धनमा रहेको दलहरुको मत जोड्दा सत्तागठबन्धन एमाले भन्दा अगाडि नै देखिन्छ । घर्तीलाई थोरै भएपनि सहज देखिएको छ । तर, उनले ती भोट आफ्नो पोल्टोमा पार्न सक्छिन् कि सक्दैनन् उनको लागि ठुलो चुनौती बनेको छ । घर्तीसँगै चुनावी मैदानमा रहेका नेकपा एमालेका फुँयाल भने कागेश्वरी मनोहराका स्थानीय वासिन्दा हुन् । त्यसैले उनी आफुलाई भूगोल र क्षेत्र नम्वर २ को समस्या, सम्भावना बुझेको उम्मेदवार भएकाले मतदाताको रोजाईमा आफु पर्ने बताउँदै आएको छ । बाँकी मतदाताको हातमा भर पर्नेछ ।

ठूला दललाई मत काटिने डर

एकातिर अघिल्लो निर्वाचनको मतपरिणामको अंकगणित हिसाव गरिरहेका यी सत्तागठबन्धन दल र एमालेलाई अर्काेतिर राष्ट्रिय स्वतन्त्र पार्टीकी उम्मेदवार गौतमले मत काटिने पो हो कि भन्ने चिन्ता भने नभएको होइन ।

स्वतन्त्र उम्मेदवार बनेर पालिका चुनावी मैदानमा होमिएका काठमाडौं महानगरका मेयर बालेन शाहले बढी मत प्राप्त गरेको वडा नं. ३२ यसै निर्वाचन क्षेत्रअन्र्तगत पर्दछ । यहाँका मतदाताले नयाँ अनुहार रुचाएकाले र यसअघि निर्वाचित भएर केही गर्न नसकेका दलका उम्मेदवारबाट वाक्कदिक्क बनेका मतदाताको रोजाईमा गौतम पर्न सक्छिन् कि भन्ने चिन्ता सत्तागठबन्धन र नेकपा एमालेलाई परेको छ ।

राष्ट्रिय स्वतन्त्र पार्टीकी गौतम आफैँ पनि घरदैलो कार्यक्रममा जाँदा अधिकांश युवा पुस्ता र नयाँ अनुहार खोजिएको मतदाताहरु भेटिएको बताउँछिन् । तर, उनलाई जित हासिल गर्न त्यति सहज भने छैन ।