काठमाडौँ । प्रदेश १ का वन, वातावरण तथा भूसंरक्षण मन्त्री शेखरचन्द्र थापाको निधन भएको छ । केही दिनदेखि डेंगुको संक्रमणको उपचार गराइहेका उनको निधन भएको हो ।

५६ वर्षीय मन्त्री थापाको बुधबार बिहान निधन भएको विराटनगरस्थित नोबेल अस्पतालले जनाएको छ । उनको उपचारका क्रममा बिहान साढे १० बजे निधन भएको हो ।

मोरङ क्षेत्र नम्बर ३ (१) मा कांग्रेसबाट प्रदेशसभा उम्मेदवारसमेत रहेका थापा उम्मेदवारी दर्ताको भोलिपल्टदेखि नै काठमाडौंको ह्याम्स अस्पताल भर्ना भएका थिए ।

उनलाई मंगलबार ह्याम्स अस्पतालबाट विराटनगरस्थित नोबेल अस्पताल सारिएको थियो । मंगलबार परीक्षणका क्रममा थापालाई निमोनियासमेत देखिएको थियो ।

पथरी शनिश्चरे ८ स्थायी घर भएका थापा लामो समय यसअघि तत्कालीन प्रधानमन्त्री गिरिजाप्रसाद कोइरालाका स्वकीय सचिव थिए । उनका श्रीमती, एक छोरा र एक छोरी छन् ।