काठमाडौं- आगामी ४ मंसिरमा हुने प्रतिनिधिसभा र प्रदेशसभा निर्वाचनका लागि निर्वाचन आयोगले आजदेखि अर्थात् १७ कात्तिकदेखि १ मंसिरसम्म प्रचारप्रसारका लागि समयावधि तोकेसँगै विभिन्न दलका शिर्ष नेताहरु निर्वाचन क्षेत्र र देश दौडाहामा निस्केका छन् ।
कांग्रेस पार्टी सभापति तथा प्रधानमन्त्री शेरबहादुर देउवा आज गृह जिल्ला डडेल्धुरा पुगिसकेका छन् । प्रतिनिधिसभा निर्वाचनका लागि मनोनयनसमेत वारेसमार्फत गराएका देउवा मनोनयन दर्तापछि चुनावी प्रचारका लागि पहिलोपटक गृह जिल्ला पुगेका हुन् ।
बुधबार धनगढी पुगेका उनी आज डडेल्धुराको अमरगढी पुगिसकेका छन् । उनको निजी सचिवालयका अनुसार देउवाले शुक्रबार बिहान साढे ११ बजे नवदुर्गा गाउँपालिका बेलापुर खुनी, सोही दिन दिउँसो सवा २ बजे गन्यापधुरा गाउँपालिका बडालमा चुनावी सभालाई सम्बोधन गर्ने छन् । यस्तै १९ कात्तिक बिहान ११ बजे अजयमेरु गाउँपालिका भद्रपुर, दिउँसो २ बजे भागेश्वर गाउँपालिका रूपालमा हुने आमसभामा देउवा पुग्नेछन् ।
देउवाले २० कात्तिक बिहान ११ बजे आलिताल गाउँपालिका गोदाम र दिउँसो २ बजे परशुराम नगरपालिका जोगबुढामा हुने चुनावी सभालाई सम्बोधन गर्ने कार्यक्रम तय भएको छ ।
डडेल्धुरामा देउवासँग कांग्रेस बिपीबाट कर्णबहादुर मल्ल तथा स्वतन्त्रबाट सागर ढकाल, विक्रम शाही, लाल कठायत र कर्णसिंह रावलसहितका उम्मेदवार प्रतिस्पर्धामा छन् ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ भोली (शुक्रबार) गोरखा जाने भएका छन् । १८ कात्तिकमा प्रचण्ड आफ्नो चुनावी क्षेत्र गोरखा २ मा हुने निर्वाचन केन्द्रित कार्यक्रमलाई सम्बोधन गर्न त्यसतर्फ जान लागेका हुन् ।
गोरखा सदरमुकामसहित ५ ठाउँमा चुनाव केन्द्रित आमसभा र गोष्ठी राखिएको प्रचण्डका स्वकीय सचिव रमेश मल्लले बताए ।
‘अध्यक्ष कमरेड शुक्रबार मात्रै निर्वाचन क्षेत्र जान लाग्नु भएको छ । गोरखा सदरमुकामसहित अन्य क्षेत्रमा ५–६ वटा कार्यक्रम राखिएकाले सम्बोधन गर्नु हुनेछ’ मल्लले भने, ‘अरु गठबन्धनले बनाउने आमसभा र कार्यक्रममा कार्यतालिका बमोजिम जानु हुनेछ ।’
उनका अनुसार सत्ता गठबन्धनले दोस्रो चरणमा चुनावी आमसभा र कार्यक्रम कहाँ कहिले गर्ने भन्ने विषयमा सार्वजनिक गरेको छैन ।
नेकपा एमालेका अध्यक्ष केपी शर्मा ओली पार्टीका उम्मेदवारहरूलाई मत माग्न सातै प्रदेशमा हुने चुनावी सभालाई सम्बोधन गर्न जाने भएका छन् । १८ कात्तिकदेखि चुनावी सभा शुरु गर्न लागेका अध्यक्ष ओली १ मंसिरमा अन्तिम चुनावी सम्बोधन गरेर विश्राम लिने तयारीमा छन् ।
४ मंसिरमा हुने प्रतिनिधि सभा र प्रदेश सभाको निर्वाचनका लागि पार्टीले घोषणापत्र सार्वजनिक गरेलगत्तै अध्यक्ष ओली देशभरका चुनावी सभामा सम्बोधन गर्न पुग्ने भएका हुन् ।
अध्यक्ष ओलीले १८ कात्तिकमा सुदुरपश्चिमको दार्चुलामा हुने सभाबाट सम्बोधनको सुरुवात गर्ने र १ मंसिरमा प्रदेश १ पुगेर सक्ने तयारी भएको एमाले निटक नेताहरुको भनाइ छ ।
जसपा अध्यक्ष उपेन्द्र यादव अहिले निर्वाचन क्षेत्र सप्तरी २ मा मतदाता भेटघाट र घरदैलो कार्यक्रममा व्यस्त छन् । उनी १९ कात्तिकमा काठमाडौं आउने र २० कात्तिकमा पार्टीको चुनावी घोषणापत्र सार्वजनिक गर्ने कार्यक्रम तय भएको छ ।
खुला प्रचारको पहिलो चरणमा पाँचदलीय सत्तागठबन्धनका शीर्ष नेताहरु आ–आफ्नो पार्टीले गर्ने चुनावी सभामा सहभागी हुनुका साथै मतदाता भेटघाटमा व्यस्त छन् । यससँगै चुनावी मैदानमा होमिएका अन्य उम्मेदवारहरु पनि चुनावी माहोल आफूआर्कषित पार्न लागिपरेका छन् ।