भक्तपुर : भक्तपुर क्षेत्र नं २ को प्रतिनिधि सभामा नेकपा एमालेका सांसद महेश बस्नेतले निर्वाचनपछि सिंहदरवारको नेतृत्व भक्तपुरले गर्ने दाबी गरेका छन्।
रफत सञ्चार क्लबले आयोजना गरेको साक्षात्कारमा बस्नेतले विगतको पाँच वर्ष भक्तपुरको उपस्थिति सिंहदरवार रहेता पनि अब सिंहदरवारको नेतृत्व भक्तपुरले गर्ने बताएका हुुन् ।
उनले प्रधानमन्त्री देउवाले स्वयम् दुर्लभ थापालाई हराएर देखाउन गरेको आग्रहलाई स्मरण गर्दै आफूले नेपाली कांग्रेसका तर्फबाट भक्तपुर क्षेत्र नं २ को प्रतिनिधि सभाका उम्मेदवार थापालाई तेब्बर मतान्तरले पराजित गर्ने ठोकुवा गरे ।
उनले गठबन्धनको सरकार भ्रष्टाचारमा लिप्त रहेको र गठबन्धनको प्रधानमन्त्री शेरबहादुर देउवा केपी ओलीका अघि सामाजिक सञ्जालमा चलेका भेलूबाजे देखिएको टिप्पणी गरे ।
उनले केपी ओेलीको प्रधानमन्त्रीत्वकालमा देशमा अभूतपूर्व विकास भएको तथा भक्तपुरमा समेत विकासको लहर आएको फेहरिस्त नै जीतको आधार भएको चर्चा गरे ।
उनले भक्तपुरमा आएको विकासको लहरलाई कांग्रेसले रोक्न खोजेको उल्लेख गर्दै गठबन्धन सरकार बनेपछि भक्तपुरको विकासमा अवरोध गरेको जनाए । उनले भक्तपुरका विभित्र अस्पताल र कलेजहरूमा कांग्रेसले आफ्ना आसपासेलाई नियुक्त गर्दै कमिशनको खेलमा डुबेको बताए ।
भक्तपुरको विकासको आँधीवेहरीलाई कांग्रेसले रोकेको बताउँदै आफूले शिक्षा, स्वास्थ्य , सडक, खानेपानीको विकासका लागि ल्याएको योजना र बजेटको फेहरिस्त सुनाउँदै ती बजेट र योजनालाई गठबन्धन सरकारले कटौती गरि विकासमा बाधा पुर्याउने काम गरेको उनले चर्चा गरे ।
भक्तपुर क्षेत्र नं २ मा कांग्रेसले, नेमकिपाले जीत हासिल गरेर संसदको यात्रा तय गरेको अवधिमा भएको विकास भन्दा आफ्नो एक कार्यकालमा भएको विकासको मूल्यांकन गर्न समेत चुनौति दिए।