काठमाडौँ । प्रदेशसभा सदस्य पदका लागि मङ्सिर ४ गते हुने प्रदेशसभा निर्वाचनमा भाग लिएका मोरङका दुई उम्मेदवार स्वास्थ्यमा समस्या आएपछि उपचारका लागि अस्पताल भर्ना भएका छन् ।
मोरङ निर्वाचन क्षेत्र नं ३ (क)का लागि प्रदेशसभा सदस्य पदमा उम्मेदवारी दिएका नेपाली कांग्रेसका उम्मेदवार शेखरचन्द्र थापालाई ज्वरो आएर निको नभएकाले मङ्गलबार नोबेल मेडिकल कलेजमा उपचारका लागि भर्ना गरिएको थियो ।
प्रदेश नं १ को वन, वातावरण तथा भूसंरक्षण मन्त्रीसमेत रहेका उनले सत्ता गठबन्धनको तर्फबाट उम्मेदवारी दर्ता गराएका थिए ।
यस्तै, गठबन्धनको तर्फबाट मोरङ निर्वाचन क्षेत्र नं ४ (क)का लागि प्रदेशसभा सदस्यमा उम्मेदवारी दिएका नेपाली कांग्रेसका पूर्व केन्द्रीय समिति सदस्य गुरूराज घिमिरेलाई डेंगु संक्रमण भएर ज्वरो आएकाले यही असोज २३ गते नोबेल मेडिकल कलेजमा उपचारका लागि भर्ना भएका थिए ।
असोज २३ गते नै उम्मेदवारी दर्ता गराउन काठमाडौँबाट विराटनगर आएका उनी मनोनयन दर्ता गराएलगत्तै नोबेल मेडिकल कलेजमा भर्ना भएका थिए ।