काठमाडौँ । नेकपा एमालेका उपाध्यक्ष विष्णु पौडेलले अरू दलका उम्मेदवार र कार्यकर्तालाई गाली नगर्न कार्यकर्तालाई आग्रह गरेका छन् ।
सत्ता गठबन्धनभित्र देखिएको चरम असन्तुष्टिले अरू पार्टीका थुप्रै नेता कार्यकर्ता एमालेलाई मतदान गर्न तयार रहेको भन्दै उनले विपक्षी पार्टीका उम्मेदवार र कार्यकर्तासँग मित्रवत् व्यवहार गर्न आग्रह गरेका हुन् ।
रुपन्देही २ बाट एमालेका तर्फबाट प्रतिनिधिसभाका उम्मेदवार रहेका पौडेलले अरू दललाई गाली नगरी आफ्ना विचार जनतामाझ राखेर चुनावका लागि सक्रिय हुन कार्यकर्तालाई आग्रह गरे ।
क्षेत्र नम्बर २ अन्तर्गत प्रदेशसभा १ को निर्वाचन परिचालन कमिटी घोषणा एवं चुनाव प्रचारप्रसार कार्यालयको मंगलबार तिलोत्तमाको शंकरनगरमा उद्घाटन गर्दै पौडेलले यस्तो बताएका हुन् ।
‘विगतमा रुपन्देहीमा जुन खालका ठूला विकासका आयोजना अघि बढेका छन्, तिनलाई कार्यान्वयन गरी रुपन्देहीलाई विकासको रोल मोडलको रूपमा स्थापित गर्न एमालेको जित अपरिहार्य छ,’ पौडेलले भने ।