सुनसरी- प्रसिद्ध धार्मिक तीर्थस्थल बराहक्षेत्र जाने बाटो अवरुद्ध हुदा दशैको मुखमा तीर्थयात्रीले सास्ती खेप्नु परेको छ।
चतरा-बराहक्षेत्र सडक खण्डका न्युइन्टेक, चतराघाट, कोशीपुल, धनसार खोला, मोती डाँडा, कृष्णभीर, झरझरे, १७ नम्बरलगायत स्थानमा पहिरो झरेको छ। पहिरोका कारण सडक अवरुद्ध हुँदा यात्रु र यातायातका साधन बाटामै अलपत्र परेको स्थानीय अटो चालक भीमराज राईले बताए।
अवरुद्ध सडक खोल्न सडक डिभिजन कार्यालयको डोजर र स्काभेटर प्रयोग गरी हटाउने काम भइरहेको बराहक्षेत्र नगरपालिकाका प्रमुख रमेश कार्कीले बताए।
विश्वका हिन्दू धर्मावलम्बीहरूको पवित्र तीर्थस्थल बराहक्षेत्रसम्म पुग्ने सडक सहज नहुँदा तीर्थ यात्रीले सास्ती बेहोर्नु परिरहेको नगर प्रमुख कार्कीले बताए। तत्कालको समस्या समाधान गर्न मात्रै नगरले सक्ने नगर प्रमुख कार्कीको भनाइ छ। चतरा-बराहक्षेत्र सडकको पहिरोको समस्या दीर्घकालीन निराकरणका लागि संघीय सरकारलाई पहल गरिदिन उनले अनुरोध गरे।
बराहक्षेत्रमा नेपालका विभिन्न जिल्लासँगै भारतको बिहार, उत्तराखण्ड, सिक्किम दार्जिलिङ र भुटानबाट समेत भक्तजनहरू आउने गरेका छन्।