काठमाडौं- समस्याग्रस्त सहकारी व्यवस्थापन समितिको कार्यालयले मागदाबी गर्ने बचतकर्तालाई धमाधम पैसा फिर्ता गर्न थालेको छ।
सहकारी ऐन, २०७४ को दफा १०४ बमोजिम सरकारले १२ वटा सहकारीलाई समस्याग्रस्त घोषणा गरेको छ। समस्याग्रस्त घोषणा भएका सहकारीका सञ्चालक समिति खारेज गरी सहकारी ऐनअनुसार ती सहकारीको व्यवस्थापन गर्ने अधिकार समितिलाई दिइएको छ।
चालु आर्थिक वर्षको पहिलो चौमासिकमा सरकारले घोषणा गरेका १२ समस्याग्रस्त सहकारीमध्ये एउटाको सबै बचतकर्ताको पैसा फिर्ता गर्ने गरी काम भइरहेको समितिका अध्यक्ष काशीराज दाहालले जानकारी दिए। समस्याग्रस्त लुःनिभा बहुउद्देश्यीय बचत तथा ऋण सहकारी संस्था लिमिटेडसँग २१४ जना बचतकर्ताले मागदाबी गरेका छन्। तीमध्ये ७६ जनाको पैसा फिर्ता दिएको दाहालले बताए। बाँकी १३८ जनाको पैसा पनि फिर्ता गर्ने क्रममा छ।
लुःनिभाका तत्कालीन सञ्चालक र ऋणीको जग्गा रोक्का राखिएको छ। त्यही जग्गा लिलामी गरेर बाँकी बचतकर्ताको पनि पैसा फिर्ता गर्न लागिएको हो। सोसाइटल बचत तथा ऋण सहकारी संस्थासँग २४० जना बचतकर्ताले पैसा माग गरेका थिए। तीमध्ये १३३ बचतकर्तालाई बचत फिर्ता गरिएको छ। बाँकी १०७ जनालाई पनि पैसा दिने गरी तयारी भइरहेको छ। संस्थाका सञ्चालक र ऋणीका नाममा चितवन र भक्तपुरमा रहेका जग्गा लिलामीको प्रक्रियामा रहेको कार्यालय प्रमुख केशवप्रसाद पौडेलले बताए।
स्ट्यान्डर्ड मल्टिपर्पोज कोअपरेटिभ लिमिटेडसँग १६ जनाले बचत माग गरेका थिए। तीमध्ये १४ जनाको बचत फिर्ता भएको छ। बाँकीको बचत कात्तिक मसान्तसम्म फिर्ता गरिसक्ने पनि उनले जानकारी दिए। यो सहकारीको फर्छ्यौट चालु आर्थिक वर्षको पहिलो चौमासिकमै गर्ने गरी सबै काम भइरहेको समितिले जनाएको छ।
यस्तै, कुबेर वचत तथा ऋण सहकारी संस्थासँग १० जनाले बचत फिर्ता पाउन निवेदन दिएका छन्। तीमध्ये दुईजनाको पैसा समितिले फिर्ता गरिदिएको छ। आठ जनाको पैसा सञ्चालक र ऋणीको जग्गा लिलामी गरी दिइने भएको छ। त्यसका लागि समितिले कानूनी प्रक्रिया अगाडि बढाएको छ।
प्यासिफिक सेभिङ एन्ड इन्भेस्टमेन्ट कोअपरेटिभ लिमिटेडसँग ३५२ बचतकर्ताले मागदाबी गरेका छन्। १४१ जना बचतकर्ताको ३६ करोड रुपैयाँ समितिले मिलान गरिसकेको छ। १११ जनाको बाँकी बचत पनि फिर्ता गर्ने क्रममा छ।
प्रभु बचत तथा ऋण सहकारी संस्था लिमिटेडसँग १३८ जना बचतकर्ताले मागदाबी गरेका छन्। यो सहकारीका सञ्चालक र ऋणीको जग्गा रोक्का गरी लिलामीको प्रक्रियाबाट बचतकर्ताको पैसा फिर्ता दिन लागिएको छ। कोहिनुर हिल सेभिङ एन्ड क्रेडिट कोअपरेटिभ लिमिटेडसँग ५१ जनाले बचत गरेको भन्दै पैसा फिर्ता पाउन निवेदन दर्ता गराएका छन्। यस विषयमा अध्ययन भइरहेको समितिले जनाएको छ।
कन्जुमर बचत तथा ऋण सहकारी संस्था लिमिटेडसँग ५६ जनाले बचत गरेको भन्दै मागदाबी पेश गरेका छन्। यसको छानविनमा समितिले काम गरिहेको छ। स्ट्यान्डर्ड सेभिङ एन्ड क्रेडिट कोअपरेटिभ लिमिटेडसँग १७५ जनाले बचत गरेको भन्दै मागदाबी पेश गरेका छन्। यसका सञ्चालक र ऋणीको जग्गा खोजी रोक्का गर्ने क्रममा समिति लागेको कार्यालय प्रमुख पौडेलले बताए।