कावासोती- वाल्मीकि ऋषिले संस्कृत रामायण रचना गरेको र राम-सीताका छोराहरू लव र कुश जन्मे-हुर्केको विश्वास गरिने चितवनको माडी नगरपालिकामा पर्ने वाल्मीकि आश्रममा पुग्न भारतको बाटो प्रयोग गर्नुपर्ने बाध्यता हटेको छ।
नारायणी नदीमा पूर्वी नवलपरासीको त्रिवेणीधाम र चितवनको माडी जोड्ने झोलुंगे पुल निर्माण सकिएसँगै पवित्र धार्मिकस्थल वाल्मीकि आश्रम पुग्न भारतको बाटो प्रयोग गर्नुपर्ने बाध्यता हटेको हो। असार ०७० मा झोलुंगे पुल निर्माणको सम्झौता भए पनि विभिन्न अवरोधका कारण काम पूरा भएको थिएन।
चितवन राष्ट्रिय निकुञ्ज क्षेत्रमा पर्ने भएकाले पुल निर्माणको प्रक्रिया शुरु हुनै लामो समय लागेको थियो। पुल निर्माण भएसँगै नेपालका दुई महत्त्वपूर्ण धार्मिक क्षेत्र त्रिवेणीधाम र वाल्मीकि आश्रम झोलुंगे पुलमार्फत जोडिएका हुन्।
झोलुंगे पुल निर्माण सकिए पनि पुलपारि निकुत्तजभित्रको वाल्मीकि आश्रम पुग्ने ट्र्याक बन्न बाँकी रहेको विनयीत्रिवेणी-६ का वडाध्यक्ष नुरेन्द्र शाहले बताए। ‘नदीपारिको निकुञ्ज क्षेत्रमा ट्र्याक खोल्ने काम अगाडि बढेको छ, खुल्नासाथ झोलुंगे पुलबाट आवतजावत हुन्छ। माघे औंशी मेलाअगावै पुलबाट आवतजावत हुने कुरामा विश्वस्त छौं,’ शाहले भने।
माडी नगरपालिका-१ स्थित वाल्मीकि आश्रम चितवनतर्फको सडक सञ्जालमा जोडिएको छैन। हालसम्म आश्रम पुग्न हिउँदमा डुंगा र वर्षायाममा पूर्वपश्चिम राजमार्गको बर्दघाट बजारबाट २८ किलोमिटर दक्षिणस्थित गण्डक बाँध कटेर भारत विहारको वाल्मीकि नगर तथा वाल्मीकि टाइगर रिजर्भको जंगल पार गरेर जानुपर्थ्यो।
भारतको बाटोबाट आश्रम पुग्ने नेपाली तीर्थयात्रीलाई भारतीय सशस्त्र सीमा बल (एसएसबी)ले हैरानी दिने गरेका छन्। यस्तै, भारतकै वाल्मीकि टाइगर रिजर्भमा टिकट काट्नुपर्ने र भारतीय सुरक्षा पोस्टमा ठाउँ–ठाउँमा सोधपुछ हुने हुँदा नेपाली तीर्थयात्रीलाई आश्रम पुग्न असहज थियो। झोलुंगे पुल निर्माण भएसँगै नेपालकै बाटो प्रयोग गरेर आश्रममा पुग्न सहज हुने तथा त्रिवेणी र यस क्षेत्रको धार्मिक पर्यटनमा थप टेवा पुग्ने वडाध्यक्ष शाहले बताए।