रसुवा- उत्तरी नाका रसुवागढीबाट आयात हुने चिनियाँ सामग्रीको परिमाण बढेको छ। तर, नेपालतर्फबाट हुने निर्यात अझै शून्य छ।
कोभिड-१९ महामारी शुरु भएपछि चीनतर्फको आयात–निर्यात ठप्प भएको थियो। चीनबाट हुने आयात अर्थात एकतर्फी मात्र व्यापार खोलेको चीनले अझै नेपालबाट हुने निर्यात खुलाएको छैन। चिनियाँ अधिकारीहरूले यसलाई नाकाबन्दी नभएको दाबी गर्दै आएका छन्। तर, द्विपक्षीय व्यापार पूर्ण रूपमा खुलाउने कुनै तत्परता लिएका छैनन्।
अहिले दैनिक २१ कन्टेनरसम्म सामान चीनतर्फबाट आउने गरेको छ। चिनियाँ पक्षले मितेरी पुलसम्म सामान ल्याइदिने र त्यहाँबाट नेपाली पक्षले सामान लिएर आउने कडाइ अझै कायम छ। जब कि, कोभिड महामारीअघि नेपाली व्यापारीहरू र कन्टेनर नै चीनका केरुङ तथा पाङसिङसम्म पुगेर सामान लिएर आउँथे।
अहिले आयात सामग्रीमा अधिकांश तयारी पोशाक रहेको रसुवा भन्सार कार्यालयले जनाएको छ। चिनियाँ एक कन्टेनर सामग्रीले नेपाली दुई कन्टेनर हुने र १० दिनको अन्तरालमा १५८ चिनियाँ ठूला कन्टेनरले रसुवागढीमा सामान ल्याएका छन्।
हालसम्म आयात भएका सामग्रीमा ११९ टिपर तयारी पोशाक, ३५ टिपर नेपालमा सञ्चालित जलविद्युतका उपकरण र चार टिपर ओखर छन्।