काठमाडौं- खाद्य व्यवस्था तथा व्यापार कम्पनीले मंगलबारदेखि खाने तेलको मूल्यमा थप १० रुपैयाँ घटाएको छ। छुट पसलमा बजार भाउभन्दा बढी मूल्य राखेको गुनासो आएपछि कम्पनीले मंगलबार लिटरमा थप १० रुपैयाँ घटाएको हो।
मूल्य घटेसँगै अब सर्वसाधारणले सनफ्लावर तेलको मूल्य प्रतिलिटर २८५, तोरीको तेल २७५ र भटमासको तेल २४० रुपैयाँमा खरिद गर्न सक्छन्।
ब्रान्डअनुसार तेलको बजार मूल्य फरक भए पनि पछिल्लो समय सरकारले भन्सार दर घटाएपछि तेलको मूल्यमा गिरावट आएको छ। सहुलियत पसल सञ्चालन गर्नुअघि खाद्यले सनफ्लावर ३०२ रुपैयाँ, तोरी २८७ रुपैयाँ र भटमासको तेल २५२ रुपैयाँमा बिक्री गरेको थियो।
१ असोजदेखि सहुलियत पसल सञ्चालनमा आएलगत्तै प्रतिलिटर ७ रुपैयाँ घटाएर नयाँ मूल्य निर्धारण गरेको थियो। जसअनुसार सनफ्लावर प्रतिलिटर २९५, तोरीमा २८० र भटमास २४५ रुपैयाँ बिक्री मूल्य थियो। मंगलबार मूल्य पुनः घटाइएको हो।
सहुलियत पसल १ असोजदेखि १५ कात्तिकसम्म सुपथ मूल्य पसल सञ्चालन हुने जनाएको छ।