बागलुङ- जिल्लाको ताराखोला गाउँपालिकाले बढीभन्दा बढी क्षेत्रमा उत्पादन बढाउन कृषकलाई भत्ता दिन थालेको छ। बसाइँसराइ रोक्न र बाँझो जमिनमा खेतीपाती गर्न कृषक प्रोत्साहन कार्यक्रम ल्याइएको गाउँपालिकाको कृषि शाखा प्रमुख कृष्णखर भट्टराईले जानकारी दिए।
कार्यक्रमअन्तर्गत कृषकले जति धेरै जमिनमा खेती गर्छन्, उति धेरै प्रोत्साहन भत्ता उपलब्ध गराइने उनको भनाइ छ। बाँझो जमिनमा खेती गरेवापत गाउँपालिकाले प्रतिरोपनी दुई हजार रुपैयाँ दिने भएको छ।
‘अहिले गाउँ रित्तो बनिसक्न थाल्यो, गाउँले सबै बसाइँसराइ गरेर बजार झरिरहेका छन्। गाउँमा बस्नेले पनि थोरै बारीमा मात्रै खेतीपाती गर्ने गरेका छन्। पहिले–पहिले बालीले हराभरा हुने खेतबारी अहिले पूरै वनमाराले ढाकेको छ। हरेक वर्ष उत्पादन घट्दै गएको छ,’ भट्टराईले भने, ‘गाउँपालिकाले अहिले नयाँ कार्यक्रम ल्याएको छ, यो कार्यक्रमले बसाइँसराइ रोकेर बाँझिएका जमिनमा खेती गर्न प्रोहोत्सान गर्ने र उत्पादन बढाउने छ।’
पालिकाले मिनीटेलर, धान, गहुँ, कोदो चुट्ने थ्रेटर मेसिन वितरण योजना बनाएको छ। उच्च पहाडी क्षेत्रमा पर्ने ताराखोलामा आलु, भाँगो, किबी, कोदो, मकैलगायत खाद्यबाली उत्पादन हुन्छन्।
गाउँपालिकाले जिल्लामै पहिलोपटक जैविक कृषि बगैंचासमेत सञ्चालन गरेको छ। यो बागलुङमा विल्कुलै नयाँ हो। गत वर्षदेखि शुरु भएको जैविक कृषि बगैंचा ३७ रोपनीमा सञ्चालन गरिएको छ।