पोखरा- चार देशका कलाकारहरूको सहभागितामा पोखरामा बृहत् आर्ट क्याम्प आयोजना गरिने भएको छ।
गण्डकी प्रज्ञा प्रतिष्ठानसँगको सहकार्यमा १-४ असोजमा हुने ‘पोखरा आर्ट क्याम्प’मा नेपाल, भारत, बंगलादेश र इरानका झण्डै एक सय कलाकारको सहभागिता रहने आयोजक अन्तर्राष्ट्रिय जलरङ समाज (आईडब्लूएस) नेपालले जनाएको छ।
कोभिड-१९ महामारीका कारण ललितकलाका गतिविधि भर्चुअलमा सीमित भइरहेको सन्दर्भमा कोरोना संक्रमण न्यून भएसँगै उक्त कार्यक्रम भौतिक उपस्थितिमा गर्न लागिएको हो। कोरोना महामारीले पर्यटनसहित ललितकलाका कार्यक्रमसमेत नराम्ररी प्रभावित भएको थियो, जसका कारण कला पर्यटन ठप्प हुन पुगेको थियो।
अब भने विस्तारै कला पर्यटन प्रबर्द्धन गर्दै कलामार्फत नेपालको पहिचान विश्वव्यापी रूपमा पु¥याउने प्रयास थालिएको आईडब्लूएस नेपालका अध्यक्ष एनबी गुरुङले जानकारी दिए।
‘पोखरा घुमौं र पोखराको प्राकृतिक सौन्दर्यलाई चित्रण गरौं’ भन्ने नाराका साथ आयोजना हुने कार्यक्रममा कला कार्यशाला, सेमिनार, कला पर्यटन भ्रमण र प्रदर्शनी हुनेछ।
गण्डकी प्रज्ञा प्रतिष्ठानका सदस्यसचिव मनकुमार श्रेष्ठले गण्डकी प्रदेश कला, साहित्य, संगीत र संस्कृतिको उर्बरभूमि तथा हरेक जातिको आफ्नै गौरवपूर्ण भाषा र संस्कृतिको रमणीय स्थान भएको जानकारी दिए।