काठमाडौँ । चार दिनको भ्रमणका लागि सोमबार नेपाल आइपुगेका चिनियाँ जनकंग्रेस अध्यक्ष तथा सभामुख ली चान्सुले आज उच्च स्तरीय भेटवार्ता गर्दै छन् । उनको उच्च स्तरीय भेटवार्तासँगै काठमाडौँ उपत्यकाका सवारी आगमन दिनभर प्रभावित हुने भएको छ ।
भीआईपी सवारीका कारण मंगलबार बिहानैदेखि कोटेश्वर, बानेश्वर, थापाथली, कालीमाटीसहितका सडकहरूमा सवारी आवागमन प्रभावित भएको छ । महानगरीय ट्राफिक महाशाखाले वैकल्पिक रुट प्रयोग गर्न आग्रह गरेसँगै सवारी आवागमन प्रभावित भएको हो ।
त्यस्तै, साढे ११ बजेको आसपासमा तिनकुने, नयाँ बानेश्वर, बबरमहल, सिंहदरबार, माइतिघर, थापाथली, त्रिपुरेश्वर, भोटेबहाल, टेकु, कालीमाटी, सोल्टी होटल, रविभवन सम्मको सवारी आवागमन प्रभावित हुने भएको छ ।
दिउँसो साढे ३ बजे रविभवन, सोल्टी होटल, कालीमाटी, टेकु, भोटेबहाल, कुपण्डोल, त्रिपुरेश्वर, थापाथली, माइतीघर, बबरमहल, सिंहदरबार, भद्रकाली आसपासका क्षेत्रमा सवारी आवागमन प्रभावित हुने महानगरीय ट्राफिक महाशाखाले जनाएको छ ।
दिउँसो साढे ४ बजेको आसपासमा पद्मोदयमोड, भद्रकाली, सिंहदरबार, माइतीघर, बबरमहल, थापाथली, त्रिपुरेश्वर, कुपण्डोल, भोटेबहाल, टेकु, कालीमाटी, रविभवन र सोल्टी होटल आसपासका क्षेत्रमा पनि सवारी आवागमन प्रभावित हुने भएको छ ।
उक्त समयमा वैकल्पिक मार्ग प्रयोग गर्न काठमाडौँ उपत्यका ट्राफिक प्रहरी कार्यालयले आग्रह गरेको छ ।