चितवन । दुई शीर्ष नेता आज चितवन जाने भएका छन् । प्रधानमन्त्री तथा नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओली चितवन जाने भएका हुन् ।
कांग्रेसले सञ्चालन गरेको ‘जनताको साथ’मा कांग्रेस अभियानको समापनका लागि देउवा चितवन जान लागेका हुन् । वीपी कोइराला मेमोरियल क्यान्सर अस्पतालमा हुने कार्यक्रममा देउवा अपरान्ह करिब १२ बजे सहभागी हुने छन् ।
आम निर्वाचनको घोषणापछि प्रधानमन्त्री देउवा पहिलोपटक चितवन जाने भएका हुन् । गत भदौ १० गतेदेखि सुरु भएको अभियानको पहिलो चरणको कार्यक्रम आज समापन हुँदै छ।
एमाले अध्यक्ष ओली भने मातृ शोकमा रहेका एमाले उपाध्यक्ष एवम् पूर्व गृहमन्त्री रामबहादुर थापा ‘बादल’लाई भेट्न चितवन जाने भएका हुन् । बादलकी आमाको निधन भएको आज छ दिन पुगेको छ ।
भरतपुर महानगर २ क्षेत्रपुरस्थित बादल निवासमा ओली र बादलबीच करिब एक घण्टा भेटघाट हुने एमाले नेतृ पार्वती रावलले जानकारी दिइन् । ओलीको कुनै औपचारिक कार्यक्रम नरहेको उनले बताइन् । ओली १०ः५५ बजेको समयमा भरतपुर विमानस्थलमा पुग्ने भएका छन् ।